› 選擇地區
三藩市
紐約
洛杉磯
其他美國地區
香港 台灣 北美
 
2013年01月04日

馮仁昭四圍超:
何韻詩踩高登瓊姐低智

一個商台小圈子頒獎禮,鬧出滿城風雨,班歌星口口聲聲話要團結,咪又係得個講字!最初G.E.M.唔忿氣冇獎攞,事先張揚杯葛叱咤,結果俾何韻詩、藍奕邦同商台DJ圍插。隔咗幾日,火頭忽然燒到去阿詩同完全唔關事嘅人氣網站高登天后瓊姐度,睇嚟大家又要捱貴價花生嘞!

瓊姐捍衞祖兒聲譽

事緣阿詩日前以前輩身份、仲搬埋先師梅艷芳教誨嚟教訓G.E.M.,叫佢謙虛啲同腳踏實地,點知瓊姐突然發功,轉貼一篇上年嘅報道,重提番阿詩喺上屆吒咤頒獎禮嘅前後表現。
話說阿詩原本坐定粒六攞女歌手銅獎同歌曲獎,但派彩前傳佢會食白果,阿詩激到喺facebook發難,講明要杯葛叱咤,但最終執番個女歌手銅獎,上台領獎時仲話自己係「反叛小孩子」㖭。

瓊姐轉貼呢段報道嘅目的,好明顯就係寸阿詩「今日的我打倒昨日的我」。其實阿詩可以當睇唔到算數,又或者話自己「曾經年少氣盛過」,不過佢噚日凌晨選擇喺facebook留言向瓊姐還拖:「洗鬼佢爆料咩,低能。沒有最低智,只有更低智。」正中瓊姐下懷噃。其實瓊姐不嬲以誓死捍衞祖兒聲譽同打擊祖兒潛在對手聞名,今次同阿詩開火,唔知會唔會係跟祖兒同劉浩龍拍拖有關?
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載