› 選擇地區
三藩市
紐約
洛杉磯
其他美國地區
香港 台灣 北美
 
2013年01月12日

年年幫駒媽賀壽
驚爆朱咪咪崩牙駒親密關係

58歲的朱咪咪,跑慣江湖唱酒廊,前晚在澳門出席最近刑滿出獄的江湖中人尹國駒(崩牙駒)母親壽宴。擔任司儀兼唱歌助興的朱咪咪,更替主人家邀來出爐視帝黎耀祥和方伊琪表演。朱咪咪昨日接受訪問,自爆獲壽星婆駒媽痛錫,年年撐場賀壽,她更直呼崩牙駒為阿駒,可見二人關係密切。

相關新聞:人物誌:朱咪咪唱酒廊出身

澳門江湖猛人尹國駒去年底出獄,重獲自由後與家人團聚,前晚駒媽在澳門漁人碼頭會議廳中心搞壽宴,崩牙駒邀請了三屆視帝黎耀祥、朱咪咪和方伊琪前來表演助興,原來朱咪咪是駒媽至愛,並幫手安排表演嘉賓,她為𠱁壽星婆,席間大唱徐小鳳經典金曲。

變A貨徐小鳳獻唱

崩牙駒獲釋後,前晚首年為母親賀壽,筵開133席大宴親朋,尹府壽宴的會場保安嚴密,崩牙駒全程笑容滿臉,朱咪咪、祥仔和方伊琪不但為駒媽大唱生日歌,還伴着壽星婆切蛋糕。兼任司儀的朱咪咪昨日接受本報電話訪問時,自爆受駒媽寵愛,她說:「我每年都去駒媽壽宴,十幾年前已經開始,駒媽好錫我,阿駒入獄前我都已經去,今次阿駒返出嚟,開心啲咪搞大啲,駒媽都想熱鬧啲。」朱咪咪稱呼崩牙駒為阿駒,足見他跟崩牙駒母子關係密切。
問到朱咪咪收多少酬金?她說:「我收利是,冇計錢,駒媽咁錫我,我每年開演唱會,佢都嚟捧場。呢次壽宴,佢半年前已通知我。」據知朱咪咪還幫手聯絡祥仔和方伊琪,朱咪咪說:「唔係我統籌,佢哋嗰邊都有人。」駒媽愛聽徐小鳳,朱咪咪就變身A貨徐小鳳,她說:「唱咗幾首小鳳嘅歌。」

相關新聞:話你知:崩牙駒最愛晒歌喉

傳祥仔收酬金20萬

壽宴中不乏感人場面,朱咪咪說:「全場好感人同溫馨,阿駒同細佬上台唱咗《念親恩》,兩兄弟攬住阿媽,駒媽忍唔住喊咗出嚟,咁感動點會唔喊?呢次係阿駒出嚟第一次同駒媽賀壽。」朱咪咪更大讚崩牙駒歌喉,她說:「成家人個個都好唱得,好掂。」
祥仔前晚逗留大半小時,先後唱了三首飲歌,分別是電視劇《巾幗梟雄之義海豪情》歌曲《紅蝴蝶》、《有酒今朝醉》和《前程錦繡》,其後他還跟崩牙駒胞弟尹國雄合唱了《舊歡如夢》,記者昨日致電身在內地工作的祥仔,他說:「國雄唱得幾好,記得晒啲歌詞,我仲以為要傍住佢。」
祥仔指他做過三年駒媽壽宴表演嘉賓,但由於往年崩牙駒正在獄中,前晚才首次碰面,他說:「駒哥好孝順佢媽咪,佢又好客氣,我一去到就畀咗酬金先表演。」接觸崩牙駒後可覺他豪氣?祥仔說:「睇唔出,佢同普通人冇分別。」有傳祥仔前晚出騷酬金達20萬,他避談:「錢幾多就唔好講,講得多又唔好,少又唔好,大家鍾意點傳就點傳。」

祥仔透露在後台等候時,崩牙駒帶同親友進來要求合照,他當然樂意做人肉佈景板,為江湖中人私人宴會表演可有甚麼禁忌,祥仔說:「冇乜特別唔同,始終都係一個騷,呢晚又係老人家生日,我哋作為藝人嘅,志在娛樂大家,唔理佢乜嘢背景、地位同階層,我又冇黨冇派,我接騷只係睇乜嘢性質,今次係咪咪姐叫我。最緊要老人家開心,我哋有陪佢上台切蛋糕。」

方伊琪讚歌藝出色

另一表演嘉賓方伊琪表示過往曾出席過約三次駒媽壽宴,她昨日在電話中回應:「我唔係第一次見駒哥,佢好好。」方伊琪也大讚崩牙駒兄弟為母獻唱一幕感人,她說:「咁多人同佢慶祝,最緊要老人家開心,我都係收封利是。」方伊琪指崩牙駒的歌藝有80分,她說:「佢唱得唔錯,佢哋唱卡拉OK,好多人都唔夠佢唱。」
採訪:比華利、楊潔雯

【2012年度勁膠金曲頒獎禮】
可能係今年最公正嘅頒獎禮,保證冇內定冇黑幕,快啲去投選你心目中今年最膠嘅歌曲啦!本月20號將揭曉誰是最膠XD
→ http://campaign.appledaily.com/2012awards

【齊齊投選2012年娛圈風雲人物】
入面粒粒巨星,你想咀佢,定想掟蕉過去?XD
http://bit.ly/ent_2012 (電腦版)
http://bit.ly/ent_m2012 (手機版)

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載