蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年01月22日

綠葉王:細細粒明星夢成真

小寶因細細粒一角人氣勁升,開朗、惹笑性格為觀眾受落。攝影:陳志嵐

在無綫劇《老表,你好嘢!》演細細粒夠突出,令230磅的陳嘉佳(小寶)成功上位,由特約演員變成藝員,夢想可成真,小寶笑言因體重關係不會飄飄然,難得有幾生修來的機會,她會好好珍惜,未拍過拖的她會專心工作,將感情事放埋一邊。
撰文:羅美倫

相關新聞:230磅小寶最愛吃

小寶在道具公司工作四年並兼任特約演員,在福祿壽演唱會與王祖藍跳舞被賞識,去年跟無綫簽下兩年藝員約,當日具慧眼的是監製潘嘉德,到後台邀請小寶演《巴不得媽媽…》跳海自殺肥妹,從此踏上星途。

期待跟華仔結片緣

小寶最高峯體重達250磅,中五時也有170磅,比同學重近一倍,但她自小已發明星夢:「因為選美冇望嘛,細個梗係想選香港小姐啦,我又冇恒心、毅力減肥。」因過重不可能選美,但亦因體重令她有做真正藝人的一天,被讚靚女的小寶會否考慮減肥?她笑說:「之前從來冇人話我靚女,都幾得意,減肥我日日都諗㗎,得個諗字,要減都係為健康而減,長時間冇嘢落肚太辛苦,寧願肥,既然𠵱家入咗行大家唔討厭、唔抗拒又有觀眾緣,暫時咁樣先啦。」對於被封為女神,小寶希望大家不要這樣稱呼她:「我完全唔符合,能夠用咁嘅身材入行,人哋唔討厭唔反感已經係恩賜。」
正式成為藝人,小寶暫時仍會兼顧道具公司工作,如工作太多會轉全職,問到有甚麼期望,小寶說:「希望可以劇接劇、騷接騷,唔好有空檔,再忙都OK,冇覺瞓都得。」小寶稍後會再被安排拍劇,最想跟那個男藝人合作?小寶想了想說:「劉德華啦,我睇八卦新聞話劉德華會返無綫拍劇,我好欣賞華仔。」想做華仔女友?小寶說:「做妹妹好,我係獨女,冇哥哥愛錫,佢演技咁好,我就有幾個月可以沉醉畀哥哥錫啦!」

謝絕性感怕惹負評

劇集中的肥妹角色通常都沒有感情線,未拍過拖的小寶會否想拍劇時一試戀愛感覺?她笑言:「性感、親熱戲盡量唔好啦,會令人討厭,自暴其短,都唔想公司接投訴,𠵱家就話我得意,之後就話我唔知醜㗎喇!」小寶不擔心肥妹熱潮過後會惹來批評,她認為只需做好自己,問心無愧就夠了。至於真正拍拖,小寶也不恨試:「唔想拍拖喎,𠵱家好開心,未試過嘅嘢對我會係開心定唔開心都未知,既然有咁好機會實現我想做嘅嘢,會將精神擺晒落去,呢個機會唔知積幾多世福至得番嚟,所以暫時只諗工作。」
現仍在觀塘返工的小寶,平時不施脂粉,她笑言根本沒人認得她,雖然體重爆燈,她沒有因而不開心:「我坐地鐵明知坐落去會逼到隔籬,咪唔坐囉,明知時裝店啲衫唔啱我着,咪唔入去亂掂囉,平時我近視又唔戴眼鏡,又聽住歌,又盲又聾,就算有人笑我肥,我都唔會知。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載