蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年01月26日
馬上成為壹會員

Bob虜芳心

新城DJ林盛斌(Bob)沒有男神的外在條件,但勝在夠灰諧兼鬼馬,他在無綫劇《老表,你好嘢!》中大放笑彈,即成師奶殺手,Bob因為程少山這個奸角,接騷接唔停,荷包進賬六位數字。
撰文:比華利

現年33歲的林盛斌以新丁身份首次接拍無綫劇《老表,你好嘢!》,他扮演的程少山竟勾義嫂撬拍檔郭晉安的牆腳,但因Bob的假髮造型搞笑,加上舉止論盡夠突出,即使角色偏奸都甚討好,近日Bob出街不但沒被師奶或OL辱罵,反成為她們的甜心,原來眾女熱捧「少山」對湯盈盈的「導遊貞」癡心情長劍。

相關新聞:博出位:凸腩扮女人

帶挈進賬逾十萬

Bob昨在黃埔一個公園接受本報訪問,有機會參與《老表》,Bob表示要感激伯樂王祖藍和監製黃偉聲:「祖藍不停執我哋幾個新丁嘅角色,佢花咗好多時間同心機,令每個角色都好出。」當然Bob也多謝對手湯盈盈帶他入戲:「我同盈盈有床戲,當時傳佢有咗,但佢又冇同我哋認過,大家就照拍,有場戲仲交代佢要跌倒坐喺地,盈盈唔錫身照拍,好專業。仲有場戲講我哋喺尖沙嘴街頭嗌交,佢一拍啲眼淚就喺眼眶滾滾吓,講對白就滴咗落嚟,我反而谷極都冇,導演見我鏡頭前眼紅紅都已收貨。」

Bob的4歲長女林霏兒要早睡返學,但都偷雞用iPad追看myTV,他說:「我有次見佢拎住iPad識㩒嚟睇,仲話同學仔同佢講爸爸扮女人好搞笑。」Bob自知演技未到爐火純清的地步,故不敢挑戰層次太深的角色,他說:「好似《大太監》同《名媛望族》呢啲戲未啱我演,我暫時演吓喜劇先,希望將來有進步先再嘗試。」Bob期待監製多點起用他,令他長拍長有。Bob的體形較出道時明顯消瘦了,他說:「我冇刻意減,曾志偉有次見到我,佢叫我千祈咪瘦,否則唔搵我做嘢,佢仲話我生不逢時,早生廿年,大把戲拍。」
Bob近年的事業發展順利,正是想嗰樣得嗰樣,他亦心滿意足:「尤其係近排《老表》收視好,好多客戶搵我做嘢,呢幾個月接嘅騷錢夾埋都有六位數字。」Bob一家四口等過肥年,身為廿四孝老公的他自爆財政全權交給老婆:「真心多謝老婆將頭家打理得井井有條,我可以放心工作。」

相關新聞:Bob偕妻湊女掃街

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載