› 選擇地區
三藩市
紐約
洛杉磯
其他美國地區
香港 台灣 北美
 
2013年02月02日

有話兒:葉準宗師字典

葉準點起煙斗,細說父親葉問生前點滴,繚繞輕煙帶他返回當年隨父學武的歲月。攝影:陳志嵐

《一代宗師》令葉問的故事再被翻熱,為多部宗師事蹟電影擔任顧問、葉問的長子葉準再次成為傳媒訪問的對象。葉準師傅憶述父親生前軼事,宗師跟徒弟的關係亦師亦友,同門的李小龍亦不如外間所講般囂張……葉準就如宗師歷史的活字典。葉準亦品評五位先後扮演其母親角色的女藝人,最欣賞袁詠儀及內地藝人韓雪。
撰文:何永寧

葉問電影一部接一部,衍生不同版本的演員扮演宗師,先有甄子丹、再有杜宇航,到近日的《一代宗師》上映,梁朝偉一派儒生風範的宗師形象,令葉問的話題再熱起來。先後為多部葉問電影擔任顧問、葉問的長子葉準師傅早前在授徒的武館內接受訪問時表示,相信葉問的熱潮還會興盛多一段日子,因為電影及劇集還陸續有來,他說:「今年都好熱鬧,完咗《一代宗師》,遲啲會有黃秋生講晚年葉問嘅電影,鄭嘉穎套電視劇遲啲會喺高清翡翠台播,所以個熱潮會繼續,對推廣詠春係好事,多啲人識。」

相關新聞:葉問改良練武木樁

偉仔詠春玩得好

跟88歲的葉老師傅做這個訪問,他罕有地要求錄音,葉師傅說:「因為試過有人報道出嚟嘅同我講嘅唔一樣所以要錄。」跟葉問電影一樣,周刊、報章甚至電視台對葉準師傅都趨之若鶩,下星期他又要接受內地一間電視台訪問。剛看過梁朝偉演的《一》片,對於戲中「一條腰帶一啖氣」等眾多的名句,葉師傅笑言沒有留意,他說:「我入場主要都係睇偉仔功夫得唔得,其他冇留意,事實偉仔玩得好好,好有詠春味道。」
提到少年時學武,葉準表示當年並非由父親葉問親手開拳教他詠春:「記得當時佛山屋企大廳門口有片大空地,爸爸經常搵啲同門返嚟喺度玩黐手,其中有位姓阮嘅世叔伯就問我爸爸:『點解唔教阿準?』爸爸就話我太細個邊有心機學。最後都係呢位阮世伯幫我開拳同教我,嗰時我大概6、7歲。」

自小聽父親教拳

葉師傅表示這位阮先生大有來頭,當時北方武師派人到南方精武體育會授武,文無第一,武無第二,南北武師自然較勁切磋一下,他回想當時的情況說:「有位形意拳高手叫于樂江嚟教拳,喺當時報紙鼓吹之下,阮先生應約出戰,仲打贏場比武,報紙都有賣。」葉準自言當時未定性,要到30多歲時才正式跟父親學技,他笑說:「父親由細到大都畀我自由發揮,冇逼我學詠春,係到我真係有興趣時先教我。其實正式學之前幾年,我都已經聽咗幾年拳,好多理論已經喺晒肚度,所以一玩就識。」當時葉問授徒的地方在青山道,兩父子就住在武館,父親教拳時葉準沒地方睡被迫在旁邊聽,因此他的功夫是「聽」回來的。
對於多部葉問電影面世,作為顧問的葉準要不時面對導演及演員的提問,不少都是有趣的話題,他說:「王家衛同梁朝偉一齊同我傾,不過導演問得多過偉仔:「王家衛導演問得很仔細,佢會問父親點叫我、家人點叫佢,我話父親會叫我阿準,另外佢仲會問佛山屋企好多擺設點放,好細緻。」

欣賞韓雪演母親

葉師傅表示假如觀眾留心會發現《葉問》跟《一代宗師》葉家大宅的不同處,他說:「廣東屋簷會係圓邊好似《一》片咁,反而《葉問》屋頂係起角,因為喺上海拍,所以只有江南款式大屋可以用,識嘅人會分到。不過子丹就好注重父親授徒嘅細節,點樣對徒弟呀,起居生活呢啲細節。黃秋生就會問父親生活習慣,點坐法、應對,件長衫點着。」
葉師傅透露父親生前對徒弟很隨和亦師亦友,閒時會一起飲茶遊玩,在其他師傅眼中是不倫不類,父親都沒理只率性而行,葉準說:「我覺得咁樣教起功夫嚟會更容易。」對於在宗師的電影及劇集中先後有五位女星演過他母親張永成的角色,葉師傅較欣賞其中兩位:「扮過母親嘅有袁詠儀我覺得佢最靚,宋慧喬、熊黛林、韓雪同黃奕裏面,做鄭嘉穎老婆嘅韓雪最有氣質。」
對於葉問最為人津津樂道的徒弟李小龍,葉師傅自言跟他有數面之緣,李小龍亦沒有如當時報道所講般囂張,葉準說:「大家都係師兄弟,見過幾次面,唔感覺佢牙擦,可能小龍同傳媒關係唔好,至有咁多負面報道。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載