› 選擇地區
三藩市
紐約
洛杉磯
其他美國地區
香港 台灣 北美
 
2013年02月05日

許亦妮小三撩人鬧

【老表你好熱】無綫劇集《老表,你好嘢!》中的名媛Monica D乞人憎的程度爆錶,現實中飾演這個角色的許亦妮,最初亦擔心被師奶當街痛罵,幸好走在街上,她沒有被罵反而被讚漂亮,但亦被網民狠批她只懂眼凸凸,她承認自己是演戲初哥,被鬧之後演技可以改善。
撰文:王崇穎

近日無綫劇集《老表,你好嘢!》除了成為觀眾熱話之外,更令一眾寂寂無聞的新人迅速冒起,當中以飾演名媛Monica D的2011年港姐季軍許亦妮最受人討厭,除行為舉止乞人憎之外,她做小三介入張繼聰與王菀之的感情最令人反感,許亦妮日前接受專訪時說:「好多人會邊睇邊鬧,覺得我好衰,雖然我嘅戲份只得五、六集但都已經好有迴響,因為我嘅衰格令到王菀之嘅角色更加出位,佢演得好好令人覺得佢好可憐,我自己睇番都睇到想喊。」

被狠批眼凸凸

首次拍劇就要飾演小三做奸角,許亦妮表示絕不介意,她說:「雖然我只係一個新人,演技又唔係好好,但我覺得想成為一個好演員係乜嘢角色都要嘗試。」許亦妮表示不時收看劇集,見到戲中的自己,亦看不過眼忍不住說:「Monica咁衰㗎!」
對於不少網民指許亦妮於戲中無時無刻只懂眼凸凸,她說:「我本身對眼都好大,可能係表情上令人有錯覺,個角色都想做得比較兇惡,我仲係一個新人,演技需要去學習同磨練,雖然𠵱家俾網民話,我唔會唔開心,好同唔好嘅評價我都要接受,等我吸收完先可以有改善。」

鬧前輩壓力大

許亦妮明白做小三絕不討好,但幸好依然有不少觀眾支持,她說:「我明白一定有唔同嘅聲音,我原本以為家庭主婦都唔會鍾意第三者,好彩有唔少家庭主婦喺街見到我同我講好鍾意我,話我好正令我好開心,我終於明白啲前輩話觀眾嘅支持係對自己最大最大嘅鼓勵,我估唔到呢個角色都可以入到屋令我好驚訝。」
戲中的Monica D經常奇裝異服更有一場模仿Lady GaGa,令許亦妮一嘗搞鬼造型,她說:「戲入面角色同我本身性格完全相反,我平時都着得好簡單,最多只會着高跟鞋,同fashion扯唔上關係,戲中好多打扮都好激,我唔係好適合古靈精怪嘅打扮,而且有好多場戲我演得好有壓力,其中有場要我講啲好難聽嘅說話去鬧羅蘭姐同修哥(胡楓),例如大鬧佢哋:『諗吓自己死老竇死老母!』之類,雖然我平時都有鬧人,但就唔會鬧呢啲說話,所以拍嗰時都NG咗幾次,唔係好敢去鬧,好彩佢哋鼓勵我,叫我當佢哋係仇人就可以。」

做小三被狂插

許亦妮除了被網民指經常眼凸凸之外,與張繼聰的一段情同樣被網民喪插,她說:「有好多人以為我真係第三者,叫我將阿聰畀返阿Kay(謝安琪),仲話阿Kay呷醋,之後阿聰因為呢件事打電話畀我話佢老婆都覺得我做得好好,好支持我。雖然我同阿Kay唔熟,但好多謝佢,因為大家都只係演戲。」
許亦妮表示經常追看《老表》,每次感受很深,她說:「因為戲中王菀之同張繼聰講嘅對白令我諗起以前都有同男友講過類似嘅說話,所以有時睇到想喊,會諗番起好多以前嘅回憶。」對今次有機會參演《老表》,許亦妮十分感激監製給新人機會,但最開心是走在街上被途人稱為Monica D。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載