蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年02月19日

綠葉王:黃文標鬚哥利

黃文標最不喜歡別人叫他「茄喱啡」,希望大家不要這樣稱呼他。攝影:葉君海

服務無綫23年的黃文標留鬚形象太深入民心,遠至韓國也有人認得佢。曾經試過爆騷爆到暈,亦試過因與舊公司共度時艱,銀行戶口只得100元,苦不堪言,不過標哥很有性格,只望大家對他給點尊重,他說:「唔知我叫乜嘢名唔緊要,你可以叫我角色名,或者點個頭,我已經好開心,但你唔好叫我做『茄喱啡』!」
撰文:黃曉妍

相關新聞:定型演賊佬

未入行前,黃文標任職空運sales,後來自己開公司,可惜經營不善而要結業,本想回頭再做sales,但很多老闆不信任他,怕他儲到一班客人就辭職,結果要求他由低做起,標哥心想如果由基層做起,何不另覓一個新行業。由於當時標哥在海豹劇團做話劇,劇團導演羅卡跟電影界相熟,於是介紹標哥加入電影行,拍攝首部電影《一屋兩妻》,他說:「呢部戲需要一個舞台劇演員,所以推薦我,之後仲有搵我拍《一妻兩夫》、《不脫襪的人》等電影,不過拍電影只係玩票形式,加上電影開始走下坡,又要埋堆先有得撈。」

戶口唔夠一百蚊

當年標哥已經27歲,想找一份穩定、較長遠的職業,於是89年加盟無綫,修讀無綫訓練班,同期同學有顏仟汶。標哥透露首部參與劇集《午夜太陽》,主角有黃秋生、吳鎮宇及郭富城等,後來還接拍《同居三人組》、《卡拉屋企》等,他笑說:「當年好爆騷,唔知係咪自己價錢平,當年我簽1年120個騷,但我可以做300幾個騷,爆騷爆到暈。」
雖然有段時間頗為風光,但後來生活艱難,他說:「我媽咪以前都以為我好好景,其實我捱騾仔冇人知,我試過窮到將兩個戶口嘅錢入落一個戶口,然後㩒100蚊出嚟用,當然我試過爆騷,叫做稍為風光啲,但10年前金融海嘯,要我哋共度時艱,減人工、由120個騷減到60個騷,咪焗簽囉,所以我好多謝𠵱家個老闆,係佢衝擊呢行,呢行先有得發展。」

駁長髮拍《學警》

標哥最為人熟悉,相信是《尋秦記》的「滕翼」一角,他說:「我覺得《同居三人組》朱強角色都好突出,有人喺街見到我都叫我做『朱強』,反而內地人叫我做『滕翼』多啲。」講到最喜愛角色,標哥表示是《學警狙擊》「田七」一角,他說:「有場戲講我喺桑拿浴室被周海媚摑,雖然戲份好少,只得11集就被人整死,但我好鍾意呢個角色,因為完全改變晒我形象,駁長髮,對我嚟講幾新鮮。」

參與劇集多不勝數,形象突出亦較容易認,標哥與女友早年在東京為一間和服公司影相時,竟被一位留學生認出,標哥說:「我同女朋友去食飯,食完飯我行先,女朋友埋單,有個女侍應問我女朋友『嗰個係咪拍戲?可唔可以影相?』我女朋友叫我入去影相,我話唔係吖嘛,咁都認到,佢仲準備咗一塊board,叫我簽個名寫啲嘢,我𢱑晒頭,寫乜好呢,原來呢個女侍應係留學生,所以不可不讚一讚舊公司,市場真係好大,去韓國玩,有韓國婆認得我,喺香港,有日本婆認得我,或者我個惡樣易認,所以留鬚係我招牌。」
近年相當流行掟飛鏢,原來黃文標也是箇中愛好者,而且還參加過港區選拔賽,雖然未能勝出,但標哥未有氣餒,決定與幾位同事及隊友到台北,參加當地舉行的「亞洲電子飛鏢國際賽」,他認為勝負不重要,最重要是向比自己技術更高的高手學習。

想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載