蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年03月18日

都是那些年:梁琤為父母一退一進

梁琤重返無綫拍劇,為的是讓媽媽看到她的演出而安心。
攝影:陳志嵐
髮型、化妝:Ling Ng of LB Make Up Studio

提起梁琤,大家會記起她是身手靈活的打女黑貓,同時又是無綫劇《金枝慾孽》中弱質纖纖的福貴人,亦剛亦柔,本可有更佳發展,但梁琤更重視親情,減少演出為陪患病爸爸,現在再現無綫,也是為媽媽。
撰文:羅美倫

梁琤04年拍完《金枝慾孽》後便離開無綫,這些年甚至連內地劇也少拍,原來她減產是為陪伴患癌的爸爸,梁琤日前說:「我同爸爸好好感情,叫佢做𡃁仔,叫阿媽做玲玲,聽到爸爸患癌好震撼,我係長女,全家人睇我頭,全程陪爸爸,同佢睇醫生做化療,覺得親人最重要,諗番以前只係衝衝衝,後尾慢慢開始放慢,有啱至拍。」那時梁琤為治爸爸的病,聽說攬成都千年樹會將病治好,她就帶爸爸去,所以過去數年,產量甚少,直至兩年半前,梁琤爸爸走了,她的世界足足停頓了半年,也發覺親情最寶貴,總算覺得無憾。

最想演奸角

爸爸離世後,至去年底無綫斟梁琤簽約,促使她更快復原,她說:「咁啱我個超級粉絲玲玲,即係我阿媽,問我究竟幾時先返無綫拍劇,佢問咗好多年,咁啱時間配合到就簽。」梁琤在《烈火雄心》及《金枝慾孽》的演出讓觀眾印象深刻,再回來,可有期望?梁琤說:「好想演啲從未演過嘅角色,例如奸角,從未做過,個個都話我做唔似奸。」

90年參加亞姐入行,今年43歲的梁琤以打女成名,近年拍劇雖較少動作,但即使拍笑戲,依然會被安排若干動作戲份給她,問她想不想再打?她笑言:「打!打有打好睇,只要啱,打都唔介意。」提起當年打女的辛酸,梁琤由朝到晚打足18小時,累得她見到他他米就瞓,在這邊睡着,翌日已被人搬到另一邊,最難忘化妝時都扯住鼻鼾,雖辛苦,但她自覺幸運:「我辛苦有人知,但幕後無名英雄辛苦冇人知,我喺上海拍戲見過替身跌落嚟後腦落地,即時大小便失禁,18歲嘅小朋友咋。」

被火傷留痕

至於95年拍《影子敵人》時被火燒傷,現時手部仍留有明顯傷痕,但她說起來仍輕描淡寫:「只係𠵱家拍爆炸戲有啲怯,記得爆時有團火球包圍我,之後大家好緊張,我都緊張攞塊鏡望吓自己個樣,成個爆炸頭,冇眼眉、眼睫毛,個嘴似漢堡包咁。」她續說:「好彩啲火唔係正面嚟,否則面就好似手咁留疤痕。工作人員好關心,但一手拉我,我成塊皮甩咗,去到醫院好似豉椒鳳爪咁。」當年梁琤向家人瞞住傷勢,結果媽媽在醫院看到她時喊到似開水喉,梁琤說:「媽喊到豬頭,嗰刻我都喊,唔係因為燒傷,係因為令佢哋擔心,所以多年嚟我要自己做得健康啲,唔想做錯嘢令家人承受。」
至於感情生活,文靜的梁琤坦言像紙般白,她說:「自從做打女,啲人驚死我打佢咁,埋嚟嘅男人都問我係咪好打得,我相信緣份,個天安排自然會嚟。」

想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載