› 選擇地區
三藩市
紐約
洛杉磯
其他美國地區
香港 台灣 北美
 
2013年03月23日

我主場:周麗淇怕嫁錯郎

黃金剩女周麗淇對擇偶有要求,拍拖憧憬結婚。
攝影:仇志中

扭開電視機,三色台剛剛播着一套劇集宣傳片,聽到有人大叫「我又失戀了」,然後畫面是一個周麗淇(Niki)的近鏡,她斬釘截鐵說:「唔嫁好過嫁錯!」
33歲的周麗淇樣靚身裁不正,未婚,自稱單身,嗜好是工作再工作,工作狂,應該是一個小富婆。生活態度,我行我素,做人做事憑感覺,追求高質素生活。感情方面,戀愛態度認真,對配偶有要求,拍拖憧憬結婚,然後生仔組織家庭,從種種迹象顯示,周麗淇被確認為「黃金剩女」。
周麗淇本人直認不諱,說:「段宣傳片吸引咗你?好多人都有問我呢個問題,嗰幾句對白其實都係我心聲!」
《女警愛作戰》,肯定是度身定做!
撰文:楊潔雯

相關新聞:犯賤唔服輸

有一日周麗淇收到監製張乾文和編審關皓月來電,看到來電顯示,Niki心想:「嘩!應該有劇拍喎!」她立即接電話,兩三句開場白之後,監製單刀直入說:「個角色係一個叫呂霏俠,背景係一個衝鋒隊女警長,30歲,踏入中女行列,係嫁唔出,同埋佢係被標籤為剩女,個人好衝、好博,但係感情唔如意。」Niki一邊聽,腦入面不停打轉,監製正等待答覆的時候,Niki心入面長嘆一聲,然後窒一窒回答說:「哦!」
表證成立,剩女主題用女警包裝的新劇為Niki度身訂做,名字跟剩女掛鈎,Niki有少少尷尬,她試着為選角解畫,她說:「之後佢哋仲有講電視史上未拍過女警衝鋒隊,好早之前拍過《陀槍師姐》系列,不過嗰個係鐵馬,呢套劇好寫實,係全軍裝包裝,唔會避開敏感話題,佢哋講到明係講時事,同埋講到明係由女警出發,講佢哋乜嘢心態,聽落都幾型喎!佢哋仲話我呢個角色係要警隊同政府批准核實,用乜嘢演員去拍,如果有案底,形象唔好,都唔會考慮,怕影響警隊聲譽。呢套劇始終係代表香港,我見到好多因素好吸引,雖然話講乜嘢中女,不過都唔好理喇!」
黃金剩女Niki,緋聞不多,而且頗長情,數男朋友五隻手指夠用,算是圈中少數的忠貞烈女,對感情相當認真,談愛情的態度同樣認真,她說:「呢個圈冇秘密,都會聽過我係唔會試吓呢個,又試吓嗰個嘅人,我冇呢啲嘢,我骨子裏係一個保守嘅人,有啲嘢我好冇所謂,有啲嘢我知一定唔掂得,例如毒品,同埋感情,因為呢啲嘢好傷身,唔可以玩弄感情,hurt到人,hurt到自己,唔啱唔緊要,唔好玩囉!唔好輕視,輕佻對待一段感情,唔夾唔啱OK!唔可以預咗出嚟玩吓先。感情係兩個人嘅事,牽涉第三者嘅話,唔可以咁自私話試吓。」Niki講到咬牙切齒,似有弦外之音,此時此刻,腦海出現鄭嘉穎的名字。

剩女有人追

剩女嫁不出,不代表冇人追,Niki最近的戀情,要數紗廠太子Eric,不過Niki矢口否認,還狂呻好難找到合適對象,她說:「我覺得搵另一半,某程度上係我分配時間有問題,我都幾多工作,亦都需要對方明白我嘅工作模式,過時過節唔可以一齊過,亦唔可以好早返屋企,時間唔穩定,有幾多人可以明白,其實真係唔多,信任程度有幾高?可能我成日唔同佢一齊,佢去咗邊呢?就係信任程度,我做呢行對方點睇我好重要,時間好重要,要拍拖都要時間磨合相處,唔通樣樣心照咩?同埋對方屋企人,正常家庭都唔希望咁樣,奇怪點解成日唔見,又唔出現,你哋係咪拍拖㗎?好多意見同問題,要對方明白唔係必然,搵另一半係一個問題。」

拍拖誓結婚

雖然問題天天都多,三十有三的Niki,仍然堅守心中的信念,感情要認真,拍拖要結婚,她說:「不嬲由細到大,都係覺得喺埋一齊嗰個人就係屋企人,嗰個人係一世,拍拖會諗有冇將來,第日呢個人點樣共度餘生,我想生小朋友,亦因為我想生小朋友,所以我會諗結婚。幸好我過往經歷,我認識嘅所有男性都唔係玩同試吓,係認真,我亦分得好清楚邊啲可以玩,邊啲可以掂,所以行得埋嚟應該好明白,同埋大家放心,我唔係咁慘,有人約會吓,喜歡嘅人我都有,但係我想睇定啲先!」Niki剩女除名指日可待!
服裝:MSGM(I.T)
髮型:Debby Kwan(Hair)

想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載