› 選擇地區
三藩市
紐約
洛杉磯
其他美國地區
香港 台灣 北美
 
2013年04月09日

大企劃:煉金術師 鄒文懷

鄒文懷有點石成金的能力,多年來捧紅無數國際巨星。攝影:陳志嵐

「咚、咚、咚、咚」四塊紅磚漸變成黃金,銀幕彈出「嘉禾」字樣,提醒觀眾將有120分鐘的歡愉時刻,那是香港電影的全盛時期,人人買飛入場的年代。嘉禾電影公司,標誌着香港電影的發展,締造無數大明星,而領導嘉禾的鄒文懷,好比將紅磚煉成黃金的煉金術師,為香港電影史寫下重要里程碑。
撰文:楊潔雯

相關新聞:退休重投橋牌懷抱

嘉禾總舵主鄒文懷退下火線五年,今年已經86歲,早前他為電影資料館舉辦的「風禾盡起——嘉禾的盛世印記」展覽擔任主禮嘉賓,並接受本報專訪。對於嘉禾盛世,堪稱香港電影教父的鄒文懷謙恭地說:「我盡能力,我自己好滿意,真正的評價,係要等出面的人去評,我,太主觀喇!」他打了一個簡單易明的比喻,概括他和嘉禾的事迹:「或者唔係好適當嘅比喻,我鍾意食嘢,有得食我就食,鍾意食一路食多啲,咁究竟乜嘢係最好食,幾時揀到最好食嘅嘢,我冇諗咁多。」教父,一切隨心出發。
八旬教父,思路清晰,而且點到即止,談到以往的得與失,態度謙卑大方,經歷大半生,他口中就只有得,沒有失,他說:「咁多年製作唔少電影,最大得着係交到好多好好朋友,𠵱家好多時喺街度、戲院度撞到好多同事,都係可以親密傾偈,講吓舊時啲嘢,我覺得呢個係我好滿意嘅地方。」

對小龍印象深刻

回想當年的工作點滴,別人眼中的爭拗和磨擦,已經變成教父美好的回憶,他說:「磨擦呢個係一定有,可以話係時時發生,大家知道係因為工作,係為共同理念,所以係好普通嘅事,而最好係大家可以開誠布公,講大家唔同觀點角度,終於大家可以得到共識,共同接受大家唔同嘅意見。」教父掌舵成功,因為他早已體會到《天與地》佘詩曼口中的「和諧」,是可以容納不同的聲音,仍然彼此互相尊重。
嘉禾是一個給無數演藝紅星發光發亮的平台,鄒文懷功不可沒,但他謙虛地說:「唔好話我製造明星,我唔敢講,大家合作得好好,一個演員出名,喺國際上成為明星係好多機緣巧合,要佢自己有天份同努力。」當中,李小龍令教父印象深刻,他說:「李小龍特別啲,佢喺美國返香港正式展開電影生涯,然後一舉成名,佢後來咁輝煌成就,我巧合有咁嘅機會同佢合作,仲去到最後,我哋係好朋友。」

相關新聞:話你知:嘉禾大事年表

鄒文懷愛電影,從前為電影奔波勞碌,退休後仍然緊貼電影潮流,每星期進出電影院看兩三部心水電影,有奧斯卡猛片,外國小品,甚至港產片,他說:「因為自己愛好,我又係美國電影公會會員,每年奧斯卡選舉都會投票,差唔多所有奧斯卡片都有睇,所以我睇好多電影。」不過,問到教父最喜歡哪一齣戲時?他的答案竟然比一個新人還要小心,他說:「幾十年來好多人問我,好多時唔係好適合我去講,如果你問我,我會先問你最喜歡邊五齣電影,不過有幾齣睇過好多好多次,我個人喜好《北非諜影》(Casablanca)。」坐在身旁的女兒鄒重珩都忍不住取笑老父,說:「無數咁多次,仲攞住iPad喺度睇!」

港產電影需低頭

教父雖然退隱江湖,對香港電影的前景和發展,仍然高度關注,他認為香港搞合拍電影和拓展內地或國際市場事在必行,他說:「香港市場本身,大家都知道係小到無倫,以前香港製作電影,亦都係靠東南亞市場、台灣、星馬、泰國,呢啲市場亦靠香港產品滿足觀眾,香港產品成績往往好過美國和其他國家。情況好多時係環境改變,中國大陸市場開放,呢個市場係非常非常之大,比香港傳統市場大好多倍,要拍電影又想多啲人睇,必然要遷就一個新市場,是一個趨勢,所以我都聽好多人講,𠵱家影片同舊時唔同,甚至有人話我鍾意睇舊時嘅戲,呢個係環境變遷同市場需要,𠵱家一套影片閒閒哋收入係好過舊時好多倍,因此亦都可以將個製作成本加大,製作方面會好好多。」
港產片走下坡,一班堅持土產的電影人被指低俗,教父未有正面回應,他認為香港電影並不會迷失方向,卻難免要向現實低頭:「經濟上企得穩,唔係唯一辦法,但係最好辦法係適應大陸市場,呢個係一定想法,如果唔係,可以選擇打開國際市場去拍荷李活式影片。」所以,香港人接受現實吧!

想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載