› 選擇地區
三藩市
紐約
洛杉磯
其他美國地區
香港 台灣 北美
 
2013年04月14日

有話兒:周海媚盛女愛嗒糖

幸福滿瀉的周海媚,眉梢眼角滲着甜蜜笑意,怎也看不出是個46歲的盛女。攝影:仇志德

近年娛圈盛女排隊出嫁,但與北京筍盤男友拍拖十年的周海媚(海味)卻不為所動,劉先生求婚多次未能如願,食粒糖都開心的海味認為,兩人的感情不靠一紙婚書維繫,反而重視彼此和諧相處,他們更達成共識不婚不育甜蜜終老。
撰文:比華利

現年46歲的周海媚,早年北上掘金,在北京定居,這個轉變更遇上生命中的Mr. Right,絕對是人財兩得,她非常享受盛女人生。海味的圈外男友劉先生在北京經營建築公司,貌似劉翔,較女友年輕7歲,兩人都重視這段姊弟戀,願意遷就和包容對方,改變自己,轉眼海味和男友已拍拖十年。

相關新聞:最愛金毛

朱古力攻勢

海味自認是個愛笑的儍大姐,隨着人生閱歷多了,她更明白知足常樂的真理,她說:「開唔開心在乎自己心態,我係好簡單嘅人,我好易𠱁,請我食粒糖已好開心。」換句話說,男友劉先生當年力追可有憑糖得米?眼前的海味明顯未食糖已嗒糖說:「佢追我時成日請我食朱古力,我咪咁俾佢𠱁咗。」海味表示劉先生是經朋友介紹認識,彼此一見鍾情,雖然男方年紀比她小,但思想成熟,與海味十分投緣。
88年海味僅21歲時曾跟呂良偉在美國申請結婚,但兩人未有在一年內完成註冊,所以婚姻未有生效,海味從沒後悔這次烏龍「出嫁」,她享受盛女生活,即使跟男友劉先生感情穩定,更視對方為終生伴侶,但海味卻未有衝動做劉太,難道不想組織屬於自己的家庭?海味說:「我已有家庭啦,阿爸阿媽從未催我結婚,佢哋只要個女開心。兩個人一齊都十年,婚書唔重要,最緊要係大家相處開心,我根本唔需要呢啲繁文縟節,我哋冇諗住要小朋友,更冇需要結婚。」

經歷冷戰期

海味承認熱戀時男友劉先生不時催婚,她說:「最初有㗎,求過幾次,見我冇應承,佢求求吓都放棄。不過,𠵱家21世紀,結唔結婚都唔重要,我拍戲都着過婚紗,時裝古裝都着過九萬幾次,我已過幻想年代。」海味透露男友性格大男人,她說:「最初拍拖,佢想我退出,好多job唔畀我接。佢始終唔係呢行,試過嚟探班,見我同對手拍談情戲後唔開心,自始就唔再嚟探班,妒忌都好正常。」
情侶相處少不免有爭拗,海味說:「近年做嘢成日飛,冇時間同佢嗌交,遇上意見不合,大家盡量忍讓。其實我哋都試過冷戰個幾月,咁啱嗌交後我要去拍嘢,佢冇打電話畀我,我咪又唔打畀佢,最後拍完嘢返去,我哋已冇事。」

相關新聞:烏龍外傳

變身煮飯婆

不用開工的海味,最愛做煮飯婆,親自下廚煮住家菜冧男友,她說:「人哋成日話用美食留住男人個胃,我又冇話特登嘅,我都會為佢入廚,煲啖湯,炒啲廣東餸,整吓蜜糖雞翼畀佢食。」
短短的訪問時間已被海味的幸福氣場所感染,問她可認同現階段是人生最幸福的時候,她說:「我嘅人生起碼仲有二、三十年,我唔知𠵱家算唔算最幸福,但對比以前,𠵱家輕鬆啲,我可以選擇點過自己嘅生活。」開心笑不停,或者正是海味不老之謎。
髮型:Jo Chan
場地:Alba

想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載