› 選擇地區
三藩市
紐約
洛杉磯
其他美國地區
香港 台灣 北美
 
2013年04月15日

電視撈飯:楊怡變態癮起大開殺戒

陷入人格分裂嘅楊怡(右)四圍殺人,睇佢揸實李綺雯條頸呢幕,勁心寒!

無綫劇集《仁心解碼II》本周播結局篇,繼續有唔少踩界嘅情節,雖然師奶觀眾未必buy,不過總算有啲新意,睇睇吓都有啲毛骨悚然。承接上周嘅劇情發展,變態女殺手李綺雯刑滿出獄後,第一時間搵楊怡尋仇,點知勾起楊怡啲慘痛回憶,令佢人格分裂,開始四圍殺人!

苟姑娘跳鋼管舞

首先受害嘅係飾演富家子嘅戴耀明,話說佢迷姦女友脫罪後,因為遇上槍擊案,於是警方派咗楊怡去保護佢。點知楊怡睇唔過眼,用私刑打咗戴耀明一身,最後呢位富家子仲喺後樓梯俾人勒死。跟住李綺雯又喺後巷俾人叉頸打暈咗,黃智賢喺追捕時俾車撞到重傷昏迷,最初大家都以為楊怡個老竇李家鼎係連環殺手,後來先知楊怡先係真兇!之後佢仲用𠝹頸放血嘅變態手段行兇,最後仲脅持大肚婆蒙嘉慧逃走,結果係點?睇怕都係死路一條。

至於哨牙仔蕭正楠俾苟芸慧同陳茵媺發現一腳踏兩船,俾人摑完仲齊齊嗌分手,陳國邦為咗令哨牙仔睇清楚最愛係邊個,扮嘢話苟姑娘自暴自棄,仲走咗去跳鋼管舞,實情只不過係跳舞比賽。哨牙仔最後發覺最鍾意陳茵媺,當然大團圓結局啦!
版主:陳基征

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載