› 選擇地區
三藩市
紐約
洛杉磯
其他美國地區
香港 台灣 北美
 
2013年04月20日

我主場:李綺雯殺到彈起

李綺雯於《仁心解碼II》殺出一條血路,終於獲得外界注視。
攝影:陳順禎

從來以為李綺雯(𡃁妹)只是球星殺手、昆蟲殺手。劇集《仁心解碼II》充份證明她夠資格做變態殺手,𡃁妹的歇斯底里演繹看得觀眾心寒,畢竟如此火辣的索妹居然會有孤獨的冷是多麼吊詭。𡃁妹殺得興起令人氣勁升,她在鏡前苦練狠樣總算有回報。
撰文:何慧斯

曾經掀起不少話題的《仁心解碼II》昨晚播映大結局,因被變態殺手李綺雯激起潛在人格分裂的楊怡,殺人無數,最終走上自轟而亡之路。
今次𡃁妹的變態演出獲得不少人讚賞,她不諱言感到開心,不過,她覺得仍有改進空間,她說:「收到劇本之後,我成日對住鏡練習,睇吓點樣可以陰沉啲、兇狠啲,得閒又會睇多啲劇本,同監製傾多啲偈,每場戲比平時放大啲嚟做,不過如果你𠵱家問番我,我永遠都覺得可以做得更加好。」她續說:「但係我相信呢幾場戲會幾好睇,好少有劇集話個主角由正派變反派,最後又自殺,有啲似驚慄片,嗰幾場殺人戲仲好有電影感。」

憎恨角色

𡃁妹笑言看過自己的演出,都希望外界討厭這個人,她說:「有一場話方中信去醫院探我,出街嗰場戲淨係見到我狂嗌狂叫,其實去到後面又會有啲狂喊、扮儍嘅戲,不過方中信已經睇穿咗我係扮嘢,我睇完之後都好憎呢個人,想佢快啲死,場戲刪減咗都有啲可惜,我當然想有多啲機會出場,不過冇辦法,要為大局着想。」
面對這種難得機會,𡃁妹坦言有機會當然想再試:「自從《護花危情》之後,我多咗機會嘗試做呢啲角色,慢慢累積啲經驗,監製話我都可以做啲成熟嘢。」

約滿無綫

今年對𡃁妹而言,不單是好開始亦是新嘗試,原來她與無綫的經理人合約已約滿,她說:「我都入咗行咁多年,都希望可以試吓靠自己,如果冇合約喺身,自由度會大啲,可以試唔同嘅嘢,我𠵱家試緊做啲marketing同公關嘅工作,所以有機會同唔同公司合作,仲可以試吓幫人接工作,但係我唔會放棄幕前工作,因為我本身好鍾意拍戲,所以會兩邊兼顧。」
𡃁妹一直予人感覺是愛拍拖多過工作,最轟動當然是先與霍啟剛傳緋聞,繼而又指她暗交球員陳肇麒(陳七),更爆出密照風波。
𡃁妹有感而發地說:「我都唔係好明,有好多傳緋聞嘅人都唔識,我從來唔會主動講拍拖,一直都係專心工作,好似之前無綫搵我做《世界盃》,唔係因為我同某一個踢過波嘅人拍拖,而係體育組監製一直都知我喺亞視有主持節目,對我有信心,嗰陣我係用一個記者身份去做,事前仲睇咗好多資料做晒功課,唔識都會諗方法令自己識,見到乜嘢就拍乜嘢,我明白坊間會有呢個錯覺,不過只會令我更加畀心機去做。」
雖然回復自由身的工作尚算不俗,而且更多了不少主持工作,但談到對未來有沒有信心,她只說:「唔敢講,你知藝人嘅工作好被動,就算今次做得好,但係都要睇吓之後嘅工作安排。」

想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載