蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年04月22日

電視撈飯:思捷詐醉鬧事
Bob匿埋爆粗

無綫節目成日被人批評越做越差,最近李思捷主持嘅《玩嘢王》終於爭番口氣,前晚播出嘅第一集好評如潮,連一向寸人唔留情嘅網友都激讚,話笑到肚攣,仲好有當年吳耀漢嘅《攪攪震》嘅幽默本色!成晚俾人整蠱得最犀利嗰位係阿Bob林盛斌,佢做咗一場假婚宴嘅司儀,遇到扮嘉賓嘅李思捷醉酒鬧事、結婚蛋糕冧咗、舊愛搶新娘同新娘契爺受刺激暈低連串突發事件,聽講佢喺休息室狂爆粗口,最後被監製剪晒啲不當用語。
雖然思捷嘅整蠱兵團好逼真,但都俾部份網民質疑造假,Bob噚日喺電話度講:「唔係,因為行內人都知,好多朋友間幫上幫做job,去到啲婚宴見到導演、攝影師係識嘅都唔出奇,今次佢哋製作好認真。」

沈卓盈保守秘密

咁多難題要處理,Bob承認忍唔住爆粗:「最勞氣係抽獎利是一千變二十,我幾尷尬呀!返房我用好多助語詞鬧個伴郎,成晚嘅助語詞可以拍幾部《低俗喜劇》,監製笑住話要成段刪。」堅嬲?Bob話:「冇,玩吓唔緊要,最慘係冇咗封婚宴利是,只得一個騷啫。」聽聞Bob變成被玩對象,係睇準佢做嘢時上心,唔會有事行咗去就算,見到Bob好man咁衝去攬住思捷唔畀佢搞事,唔見一封婚宴利是,但被人封做執生王,日後大把人搵,實補得番數啦!
曾被玩嘅沈卓盈噚日返電視城為《玩嘢王》錄影,佢話之前俾人整完一路守住秘密,係希望更多人中招:「啲同事好易俾人整到,因出晒通告真嘅一樣。」而下一集就會播馬賽被整蠱嘅片段,令人好期待。

想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載