› 選擇地區
三藩市
紐約
洛杉磯
其他美國地區
香港 台灣 北美
 
2013年04月26日

電視撈飯:無綫御用看更
卿叔頸生拳頭瘤

無綫劇《金枝慾孽貳》角色繁多,鄧萃雯同蔡少芬當然繼續係焦點啦,之不過前晚一集又有新角色登場,當中以飾演黃德斌父親嘅孫季卿最令人一見難忘!點解?因為做開無綫「御用看更」嘅卿叔,左邊頸後有一個拳頭咁大個嘅腫瘤,搞到好多電視迷都勁擔心。
卿叔噚日喺電話度叫大家唔使咁擔心,因為呢個只係脂肪腫瘤,卿叔仲話:「個腫瘤跟咗我十幾廿年,佢係慢慢長大,對我冇造成不便,瞓覺都唔會痛,我已經習慣咗喇!」原來連醫生都勸佢唔好動手術,卿叔解釋:「最初發現個腫瘤嗰時,醫生話唔會大得好犀利,因為我信佢,所以咪冇理囉。後來有一直請教其他中、西醫,甚至港大一名醫學院教授都問過,佢哋都話我年紀大,加上腫瘤生咗咁耐唔知有冇血管,切除可能仲麻煩!」

維持一年一騷

卿叔係佳視藝員出身,之後過檔無綫,成日被派演「御用看更」、「御用大夫」同「御用掌櫃」等角色,角色名都不離「梁伯」、「忠叔」、「解籤佬」同中醫師等等。唔經唔覺,卿叔今年已經81歲,問佢點解唔退休?佢就話:「有提出過㗎,不過公司(無綫)提出咗個好辦法,一年簽一騷,我可以揀嘢嚟做,辛苦咪唔接囉。」所謂家有一老如有一寶,卿叔年輕時做過解放軍炮兵中尉同軍校教官,而且對中國文學、詩詞歌賦興趣甚濃,可以話係文武雙全,難怪拍《金枝貳》時德斌都會向呢位父親大人請教,卿叔話:「會問吓劇本有啲字點讀,或者問吓乜嘢意思,大家商量過。」
版主:陳基征

想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載