蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年04月27日

我主場:馬天佑爭氣80後

馬天佑是當紅的明星名人造型師,但他認為現在的成就只是起步,盼成為年代代表。攝影:葉君海

80後被標籤為沒責任心、叛逆、慵懶、自我(下刪三千字……)。年僅24歲的新晉造型師馬天佑,為80後大平反,他去年從英國學成回港成立製作公司,短短一年,styling portfolio儲起周迅、鄭秀文與蔡卓妍等紅星,成為本地時裝界新勢力。這顆80後新星寄語新生代要平心靜氣地接受批評,舒服及享受地完成每一件事,與80後共勉之。
撰文:林嘉慈

馬天佑是嘻哈搞笑的80後𡃁仔,骨子裏對工作充滿熱誠,去年於London College of Fashion大學畢業,回港開設Fame Glory製作公司,多得讀書時期在英皇、東亞及台灣金牌大風做免費暑期工,帶來極速回報,他說:「識到好多人,冇收錢,啲人覺得呢個𡃁仔真心學嘢,有四分一人搵番我做形象。」工作規模漸大,先為蔡卓妍、吳雨霏與關心妍搞唱片造型,還任今屆金像獎場刊的美術指導,接觸名旦周迅。他說:「最易造型係周迅,冇阿姐款,拍戲唔同啲,唔跟相機去,有自己tempo等你去捉。」誰最難搞?他猶豫說:「關心妍,佢太好控制,好想變到唔似佢,佢搵我嘅目的係將自己洗走。佢永遠都好chok,人哋覺得佢冇神等於寸,其實佢只係唔focus,佢成日好ready見人,唔發現放鬆先有型。」

挑戰七宗罪

馬天佑最近為何超瓊公關公司拍攝25周年慈善照,改造何超蓮、何超盈與潘楚穎等12位名人,帶超盈回迷幻銅鑼灣舊地拍攝,別具爭議性,他雀躍地說:「正囉!唔去嗰度去邊影?去嗰度話畀人知事實係點。」
大膽是馬天佑的標記,為證明任何事都有可能,他挑戰推出小說《七宗罪》:「朋友畢業後唔係做自己鍾意嘅嘢,呢一年好多人話我好幸福,我想set個例子,表達乜都唔係冇可能。我上出版社敲門,好多都話趕唔到今年書展耍走我,最後有間肯出。」新書關於購物,七宗罪包括懶惰、貪婪及貪食等,文字由編輯代勞,他負責拍攝陳法拉與文詠珊(Janice Man)等,被他喻為最難搞的關心妍亦有份:「關心妍表現妒忌,有人問佢係咪妒忌拎唔到獎?佢唔係,係妒忌有歌手可以唔行台宣傳。」

鼓勵生力軍

馬天佑上月首次任微電影美指,還準備擴充公司,他說:「影嘅每樣嘢畀多啲人睇到。」其實他並不簡單,旨在做年代代表,他說:「以前有夏永康,導演界後生嘅有彭浩翔,廿幾歲冇人。」

80後不是一面倒只有負面,至少馬天佑不是,他眼中的80後是怎樣?他說:「見工見過好多唔知自己做乜,個腦空白,唔識實行鍾意嘅嘢。」他寄語生力軍說:「接受俾人踩,俾人藐,前輩會諗:死𡃁仔得唔得㗎?要平心靜氣咁take,呢個年紀係咁,要識得點對人講嘢。佢哋唔識舒服去做嘢,我每次收工好似party完咗咁開心,要保持到40歲都係咁。」

想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載