蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年06月02日

甘草丁主惠控訴王維基收買人命

王維基為首的香港電視雖未獲發牌,但仍不停燒銀紙拍劇,惠英紅最近助陣參演新劇《我阿媽係黑玫瑰》,其中一名由無綫過檔的甘草演員丁主惠前晚向本報訴苦,指上周拍攝一場被推跌戲時,未獲安排替身,最後要她親身上陣,令她拉傷肌肉,現在需戴頸箍兼做物理治療。丁主惠公開希望王維基關注事件。

相關新聞:人物誌:高齡拍露股寫真

王維基揸弗的香港電視近年頻頻出招向港府施壓求發牌,同時不停安排旗下藝人拍劇儲存貨,最近在網上先後播出《童話戀曲201314》、《開腦儆探》、《警界線》和《歲月樓情》四套新劇的片段,近日又邀來金像影后惠英紅主演新劇《我阿媽係黑玫瑰》,該劇拍得如火如荼,但甘草女演員丁主惠上周一開工時發生意外,她前晚向本報披露受傷經過,並大呻受不公平對待。

拉傷背肌須戴頸箍

年過半百的丁主惠演出過不少無綫劇,至去年9月簽約香港電視兩年,上月為其首部香港電視劇集《我阿媽係黑玫瑰》開工,跟扮演黑玫瑰的惠英紅有對手戲。不過,丁主惠上周一拍攝推撞鏡頭受傷導致後背肌肉拉傷,經診治後現在要戴頸箍。她前晚在其中環半山寓所接受訪問,表示受傷戲份是被黑玫瑰追捕時推倒落地,但當日的黑玫瑰卻非惠英紅,只是她的替身,丁主惠說:「我唔係就咁跌,係要向前扭,真係好危險,咁就出事。」她指根據程序表,她跟對手均有替身代勞,但現場未看到替身,向劇組提出時又沒人解答,丁主惠當時擔心自己沒受過專業訓練,及後在不願意情況下上陣最終出事,她說:「我第一下跌係就住,到咗第三次,武指就唔係咁開心,教我你要咁跌,但佢哋冇offer護墊畀我,係我提出先畀,唔係跌咁簡單,跌過程要訓練,我有講我出身演員,唔係替身,但當然冇人聽到,只好照做。」

相關新聞:話你知:王維基善待員工自居

丁主惠跌後痛至叫了出來,但怕阻礙進度,只休息15分鐘便頂硬上繼續,誰料又被要求拍第二場,同樣又要被推跌,這次卻沒墊上榻榻米保護,令她傷上加傷。丁主惠馬上抗議:「我話唔得,第二次跌落石屎地,仲要對手個替身跳板後,打觔斗落喺我面前,呢個動作好危險,唔小心跌歪咗會跌落我度。於是我認真同導演講,對唔住,我唔拍,之後先搵替身出嚟。」她不明現場明明有替身安排,卻要演員親身上陣。問她會否覺得因為是甘草才受冷待?丁主惠力數說:「我角色都幾重要,係平等,大家都咁重要,我諗問題係佢哋唔尊重演員,唔識分別演員係演戲,唔係做替身嘅嘢。」

發聲盼王維基關注

除了受傷,丁主惠也遇上不禮貌對待,事緣受傷前一天在馬鞍山開工,當日兩次向劇組拿飯盒不果,至晚上10時45分工作人員竟稱飯盒已丟掉,她說:「大佬呀,我8點鐘同PA(助導)問,你唔畀,𠵱家問話掉咗,當時唔識嬲,點解啲人咁做嘢,好過份。」她翌日打算向藝員部反映,卻意外受傷,之後她再致電有關部門,對方回覆:「吓吓吓,咁都得?」答案hea爆,丁主惠最後在網上向王維基投訴,投訴卻轉交另一部門,負責同事表示會調查。
丁主惠受傷翌日便往看醫生,她說:「佢話扭到後背,因為肌肉連住,扭親會扯到頸,整到我頭痛,醫生開咗止痛藥,要做物理治療,影響到日常生活。」她指這次控訴,是希望向口口聲聲關注員工的王維基反映,並非要追討賠償,她續說:「點忙都要注意吓,有同事話同劇組講咗,但回覆我親自做逼真啲,不過推我嘅都係替身。」可覺公司安排大細超?她說:「係公司疏忽,我覺得要講出嚟畀王生(王維基)知,其他藝人都要知,我哋演員係有權利。」

香港電視發言人鄭靜雯昨證實丁曾在王維基網誌留訊息,當日他太忙未看到,行政總裁杜惠冰獲悉已即時了解,鄭靜雯昨在電話說:「行政總裁親自打電話畀佢了解現場情況,佢受咗傷,我哋會繼續跟進。至於飯盒一事,可能係當晚劇組溝通出問題。」鄭靜雯謂替身安排視乎拍攝動作的危險程度:「丁主惠角色企喺度俾黑玫瑰推跌,當時有榻榻米同護膝提供。」至於扮演黑玫瑰的惠英紅,據知她跟丁主惠的對手戲是替身代勞,小紅昨在電話說:「我有聽過呢件事,我唔喺現場,唔清楚件事。」
此外,香港電視食髓知味,前晚再在YouTube播出夏雨、黃日華和鮑起靜主演新劇《歲月樓情》首集約5分鐘片段,至昨晚截稿前已有近3萬點擊。該劇內容似家庭倫理劇,甚有港台劇感覺,幾位老戲骨表現出色,片段燈光仍是偏暗。
採訪:林妃
攝影:黃偉雄

逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://add.appledaily.com 睇番足本網上版,除咗有專訪外,仲有好多時裝靚嘢睇!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載