› 選擇地區
三藩市
紐約
洛杉磯
其他美國地區
香港 台灣 北美
 
2013年06月04日

着平底鞋襯男友
亞男拖祖藍睇戲嘆蒸飯

【ifc→愉景灣】王祖藍同國際華裔小姐冠軍出身嘅李亞男,呢對長短腳之戀嘅情侶,到今時今日可謂打風都打唔甩。前日下晝3點幾祖藍趁唔使開工,同女朋友出動拍拖,剃咗光頭嘅祖藍戴住cap帽踢住拖鞋就出巡,認真自由自在,而本身高過男朋友嘅亞男,為咗減低兩人嘅差距,仲刻意着咗對平底鞋行街,認真體貼。

買嘢癮起

佢哋先將架車泊喺中環ifc,然後坐船去離島愉景灣漫步,感受大自然氣息。之後大概5點鐘去返ifc,去咗一間專賣燉湯同蒸飯嘅外賣店買飯同湯,呢間外賣店強調冇味精同雞粉,經過一輪研究,祖藍同亞男買咗足足三大袋。買完燉湯、蒸飯之後佢哋返落停車場,將其中兩袋放落車之後,祖藍仲攞定外套,可能怕戲院冷氣會凍親女友,真係細心。跟住祖藍攞住剩低嗰袋蒸飯上返商場,兩個人行咗去ifc嘅戲院,買咗一場5點40分嘅戲票,捧導演陳可辛場,睇佢套新作《中國合伙人》。

未夠鐘祖藍已經入場,入到戲院,買嘢癮起,再喺戲院嘅咖啡店買咗包咖啡粉同兩支飲品至肯入場。不過令人奇怪佢帶住咁大袋飯入戲院唔知做乜呢?唔會係一邊睇戲一邊開飯咁慳家啩。
採訪、攝影:陳辰

逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://add.appledaily.com 睇番足本網上版,除咗有專訪外,仲有好多時裝靚嘢睇!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載