› 選擇地區
三藩市
紐約
洛杉磯
其他美國地區
香港 台灣 北美
 
2013年06月05日

電視撈飯:新劇首播反應佳
萬綺雯爆拍床戲被圍

無綫經過神化劇《神探高倫布》同睇唔明嘅《金枝慾孽貳》洗禮,前晚播套正常嘅《好心作怪》,觀眾即刻收貨,口碑唔錯,第一晚收視有24點(約154萬觀眾)㖭!梗係啦,個劇一開始就清楚交代幾個主角嘅職業同性格,睇一集就明晒。
至於演員嘅表現,三哥苗僑偉第一集已經好搶鏡,又fit又型,演佢老婆嘅萬綺雯(蚊蚊)更加索爆,而黃宗澤嘅靚仔醫生造型都殺晒,唯一要挑剔嘅,係佢呢個心臟科醫生同上司討論病例時,全程講中文,只係得「將個patient交畀佢哋follow」呢句,又真係窄咗啲。

老公恨睇妻勾佬

講開蚊蚊,今次係佢第一次演大反派,佢因為三哥換咗心性情變,夫妻感情差而去勾佬,除咗同袁偉豪有好多場激咀戲外,蚊蚊仲有場喊住出浴戲㖭。蚊蚊噚日喺電話訪問中話啲激情戲可以推進劇情,所以唔介意,不過講到一場同袁偉豪喺廠嘅床上戲,搞到佢好尷尬,蚊蚊話:「突然間多咗十幾廿個男人圍觀,三哥仲坐喺梳化睇,拍完之後個個笑咪咪有啲嘢咁,之後我咪打畀老公囉,老公知道後話唔緊要,應該當佢哋冇到放膽做,我老公真係好大方!」
會唔會唔畀老公睇呢啲戲份?蚊蚊笑言:「佢會晚晚捧場,話想睇吓我勾引人,因平時睇唔到我風騷一面!」
版主:陳基征

逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://add.appledaily.com 睇番足本網上版,除咗有專訪外,仲有好多時裝靚嘢睇!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載