› 選擇地區
三藩市
紐約
洛杉磯
其他美國地區
香港 台灣 北美
 
2013年07月25日

電視撈飯:不滿《食為奴》飛紙仔
萬綺雯拍到喊

早排有報道指萬綺雯(蚊蚊)喺橫店拍攝無綫劇《食為奴》時,就算腰部有舊患都要繼續拍打戲,又話蚊蚊處處俾人恰,所以佢一返香港見到老公陳十三就激動到喊!聽聞蚊蚊喺橫店的確曾經拍到喊,不過唔係因為舊患,而係因為冇劇本要飛紙仔(即係臨場先有劇本)。
話說蚊蚊喺套劇入面好鍾意張繼聰,有場戲講佢發現自己一直俾阿聰利用同出賣,不過阿聰臨死剖白,話其實真係鍾意過蚊蚊。原本蚊蚊諗住早啲睇劇本揣摩吓場感情戲,點知臨門一腳至有劇本,蚊蚊覺得咁趕好難處理得好,所以勁唔開心,忍唔住喺化妝間喊咗出嚟,好在有阿聰同王祖藍等一班演員安慰。
前日問到監製黃偉聲呢單嘢,佢就話:「佢(蚊蚊)眼紅紅咁啫!嗰場戲對佢嚟講好重要,不過咁『忟』先至有劇本,係有啲唔開心嘅。我當時有問佢,佢就一味擰頭唔肯講。」原來黃偉聲之前曾經為咗飛紙仔問題同班編劇嘈過,可惜去到橫店都係冇改善。前日問番蚊蚊,佢依然唔肯多講,只係話:「留番部劇出街先宣傳,到時再爆多啲內幕料你聽。」

內地臨記搶飯盒

另外,聽聞《食為奴》頭幾日喺內地開工放食晏時,俾內地班臨記搶晒啲飯盒,由於好多仲係一人攞兩盒,搞到香港班幕前幕後冇飯食!後來將兩邊啲飯盒各自分配,香港班人先至有啖好食咋。
版主:陳基征

倪匡、蔡瀾同肥佬黎約埋一齊《亂噏24》,你睇咗未?
唔睇冇話題,第二集足本放送中!速上:
http://hk.apple.nextmedia.com/livestream/channel/talk24

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載