› 選擇地區
三藩市
紐約
洛杉磯
其他美國地區
香港 台灣 北美
 
2013年08月10日

我主場:
創作《歲月如歌》十年後撼低阿Lam
徐偉賢𢱑撈還債

《歲月如歌》事隔十年再獲激讚,令作曲的徐偉賢感到很鼓舞,他坦言如果沒有這首歌,可能早已放棄了音樂。攝影:陳俊強

現年34歲的唱作歌手徐偉賢,於初出茅廬時作曲、陳奕迅主唱的《歲月如歌》,「天氣不似預期,但要走,總要飛」今日竟然撼低65歲殿堂歌手林子祥(阿Lam)創作及主唱的《衝上雲霄》,徐偉賢自評《歲》旋律普通只值75分,讚阿Lam唱《衝》很有男人的感覺;只出了四張碟的他自嘲歌手難撈,戶口曾只餘十多元,至今仍欠公司50餘萬!
撰文:余燕儀

出道13年的徐偉賢終於捱出一點成績,網民勁彈林子祥和鄭國江創作的《衝上雲霄》老土,紛紛要求無綫重用《歲月如歌》做《衝上雲霄II》主題曲,徐偉賢想不到舊作至今仍得到寵愛,他說:「好神奇!呢首係我入行第一年創作嘅歌,當時(03年)首先出陳奕迅(Eason)國語版《兄妹》,之後無綫做《衝》用呢首歌,好多人都喜歡,估唔到過咗十年後做《衝II》,𠵱然有咁多網民支持,對自己創作好大鼓勵。」

自嘲旋律普通

於演藝學院修讀古典鋼琴演奏的徐偉賢,入行第一年寫了百幾首歌,《歲》就是當時的作品,可惜卻一首都沒被採用,等了年多才有生機!他慨嘆:「自己都有啲氣餒,當然自己好多地方要改進,後來有監製同唱片公司肯用自己嘅歌,發覺有啲嘢原來要等待。其實《歲》唔係我最鍾意嘅歌,旋律好普通,自己對創作要求高,呢首歌只有75分,但配合套劇令首歌錦上添花,Eason唱得真係幾好,天時地利人和。」
被網民勁彈老土兼似墜機的《衝上雲霄》,徐偉賢卻另有一番感受:「唔覺得好似出面講得咁嚴重,鄭國江係前輩,填過好多我喜歡歌詞,好似《漣漪》、《千年女王》、《IQ博士》,阿Lam更加唔使講,佢有好多hit歌,《歲》畀人認同可能先入為主,如果十年前阿Lam首歌出先,我嗰首都可能畀人覺得冇嗰種感覺,佢哋係前輩級作品,我係欣賞,旋律抽出嚟睇可能80年代啲,但好啱阿Lam去唱呢種《男兒當自強》、《真的漢子》風格,係阿Lam標記,很男人感覺,可能我唱就好老土,經理人有時都話我寫歌好深,呢啲唔可以賣錢,尤其電視主題曲要入屋。」

欠公司逾50萬

性格內斂的徐偉賢鍾意透過音樂講自己故事,於04年做埋唱作歌手,可惜歌手難撈,他嘆說:「做歌手係細個夢想,但買碟嘅人越嚟越少,餬口都難,有時搵到萬幾,有時幾百,見住銀行戶口由五位數去到十幾蚊,真係現實同理想問題,以前教琴三、四萬一個月,做歌手後時間難安排,惟有停晒教琴,問公司借咗50幾萬,𠵱家仲未還。」
幸好《歲月如歌》再掀熱潮,令他沒有放棄音樂:「我等待一個機會更多人認識,好似最近多人播《歲》,Eason嘅20幾場演唱會都有唱,希望多啲人搵我寫歌。」十三年的創作生涯,徐偉賢曾跟多位歌手合作,他最感激Eason:「佢令我作品提升,佢嘅音樂觸覺好好;我寫過首《每天愛你少一些》畀鄭秀文,佢有唱紅歌嘅能力;謝安琪係我好喜歡女歌手,聲音好有穿透力,《活着》呢首歌搵到主人,歌好似每個人命運,要搵到一個好人家。」
髮型:Philip Lee of Hair

講電影變講國情,阿澤彭導最後一星期做嘉賓,
未睇?即上《亂噏24》重溫!
http://bit.ly/appletalk24

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載