› 選擇地區
三藩市
紐約
洛杉磯
其他美國地區
香港 台灣 北美
 
2013年08月20日

電視撈飯:無綫改編韓親子真人騷
Bob李霖恩湊女一頭煙

無綫搞親子真人騷,嘉賓Bob話要煮嘢畀5歲囡囡食,覺得好高難度。

韓國親子真人騷《爸爸去哪裏》大受歡迎,因為觀眾可以睇吓藝人爸爸帶自己啲仔女過兩日一夜旅程發生嘅笑料,最近無綫已經買咗版權,亦都搵咗保安局前局長李少光個仔李霖恩、林盛斌(Bob)、胡諾言、林子博同章志文做嘉賓,仲開始拍緊㖭。

體驗老婆嘅辛苦

有個3歲幾囡囡同1歲囝囝嘅李霖恩噚日講到拍呢個節目,自己都忍唔住笑,佢喺電話度話:「仲未知去邊,但應該喺荒山野嶺,今次將會係我第一次單獨帶囡囡出外過夜,囝囝太細唔會帶喇,我一個實搞唔掂。」講到囡囡,霖恩直認佢冇乜紀律:「佢都幾曳,夜晚特別黐媽咪,見步行步啦!哈哈……如果搞唔掂,喺鏡頭前會照鬧照𡁻㗎!」
另外,阿Bob亦話已經開咗工,佢噚日喺電話度話之前拍咗啲花絮,要佢煮嘢畀5歲囡囡食,都已經搞到佢一頭煙,覺得好高難度,遲啲要單獨帶囡囡過一晚夜,Bob咁樣形容:「我諗都係幾恐怖嘅經歷,唔知可唔可以同佢平安咁度過一晚!要𠱁佢開心唔難呀,我最怕要我幫佢沖涼、刷牙、煮早餐,我平時唔會做呢啲嘢。」不過Bob好多謝無綫搵佢做,等佢有機會知道老婆平時有幾辛苦,同埋多啲時間同囡囡相處。
版主:陳基征

相戀54年!倪匡向全世界說:「到現在這麼多年,還是這麼深愛太太!」
你都想分享一點甜蜜?立即重溫今周《亂噏24》!
http://bit.ly/appletalk24

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載