蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年09月01日
馬上成為壹會員

黃金視窗:馬國明High爆雲霄

馬國明入行已經14年,直至近年才捱出頭。
攝影:陳俊強

「我從來都冇一個框框畀自己,喺演戲嘅世界裏面,只要合情合理,做乜都冇所謂,唔會因為現實接受唔到嘅事就唔做,做演員係唔應該有呢啲嘢。」馬國明入行14年,去年在《On Call 36小時》演「張一健」捱出頭,最近在《衝上雲霄II》中,他與江美儀一段姊弟戀,惹來不少迴響,有人覺得重口味,有人覺得像母子戀,無論外間怎樣批評,對於馬明而言,再度參與《衝上雲霄II》的演出,意義大於一切。
撰文:何慧斯

從來覺得男演員比女演員幸運,演藝事業的壽命比女演員長,即使年過半百,仍可配一些年輕貌美的女演員演情侶,贏盡男觀眾的艷羨目光;反觀女演員隨時不到30歲,已經逃不過做媽媽的命運,甚至當被安排與年紀較自己小的男演員演情侶外間總是看不過眼,劣評如潮,情況慘不忍睹。
被視為新一代筍盤的馬國明(馬明),今次在無綫劇《衝上雲霄II》中,與江美儀的姊弟戀,正正遇上這問題,但馬明一於懶理,他說:「我覺得真係好睇你接唔接受姊弟戀,我自己覺得OK,事關喺戲裏面佢哋兩個係好夾,所以好自然咁行咗埋一齊。我喺現實生活未試過姊弟戀,但係我覺得只要你鍾意一個人,年齡真係唔係問題。」

相關新聞:闖影圈儲彈藥

盼演同志自我挑戰

或許因為形象所限,觀眾理所當然覺得小生一定要配花旦,對此,馬明說:「我一開始已經知道會有一段姊弟戀,今次係有別於過往觀眾覺得馬國明理所當然襯楊怡、李詩韻,襯邊個邊個,總會有少少唔同,我覺得作為一個演員冇乜所謂,如果將來有套戲,要我拍同性戀,我都會做。我從來都冇一個框框畀自己,喺演戲嘅世界裏面,只要合情理,做乜嘢都冇所謂,唔會因為現實接受唔到嘅事就唔做,做演員係唔應該有呢啲嘢。」
馬明10年前參演過《衝上雲霄》,想不到10年後又有份演《衝II》,無論在戲內戲外都有轉變,馬明笑說:「你問我會覺得真係好好運,條路亦唔算好難行,係幸運嗰批,因為太多師兄仲等緊機會。今次再拍對我嚟講感受好深,嗰陣做咗3年甲乙丙,《衝》係我第一個有對白、有角色連戲嘅劇集,所以今次對我嚟講紀念價值仲好大,意義大於一切。」
去年馬明憑《On Call 36小時》的角色張一健突圍而出,但《衝II》的焦點集中在吳鎮宇和張智霖身上,馬明坦言:「我會形容自己今次係配角,但係冇所謂,亦唔介意係咪主角,最緊要條線好唔好睇。好似拍《真相》嘅時候,我只係得4集戲,但係我好鍾意,每一套劇係團隊工作,我冇呢方面嘅擔憂,只係擔心出嚟嘅效果好唔好睇,我想改變戲路,亦唔介意去改。」他更笑言不介意被提名男配角,只要集齊男配角和視帝,相信對賺外快有一定幫助。

甘認大叔怕湊𡃁妹

一直希望可以嘗試不同工作的馬明,先後因為檔期不合喪失了不少機會,不過稍後他將會參與電影演出,收到劇本的馬明仍未有時間鑽研,但他被問到拍電影會否更加無底線?他說:「可能會去盡啲㗎!始終電影同電視嘅尺度唔同,不過都要睇劇本需唔需要有呢場戲,如果無端端整一場床戲,只係為咗令觀眾有noise,我諗拍戲唔會係呢啲咁嘅嘢,而係嗰場戲真係有message帶出嚟,我諗做演員真係冇所謂,反而應該豁出去。」問馬明會否期待?他笑說:「點都會嘅,始終我未試過拍電影,我都想試吓同外面啲演員、導演合作,話唔定呢個經驗會對我將來喺無綫拍劇有另一個幫助。」
即使被視為筍盤,馬明一直未有新戀情,再三追問他的感情狀況,他總是笑笑口稱專心工作,要努力賺錢,笑問他會否發展姊弟戀?他說:「唔知呀,始終未遇到,但係太𡃁妹又唔得,我唔介意俾人叫大叔,只係覺得唔知點湊佢。有時拍劇遇到啲20歲嘅女仔,同佢哋拍嘢好似湊女,真係好攰。好彩只係拍戲箒,真嘅我真係死畀你睇。我有啲朋友話60歲嘅男人梗係鍾意啲20歲嘅女仔,其實我真係唔係囉,我唔可以當佢小朋友咁湊,我寧願佢有啲思想,成熟少少,我湊唔慣啲小朋友。」

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載