› 選擇地區
三藩市
紐約
洛杉磯
其他美國地區
香港 台灣 北美
 
2013年09月26日

電視撈飯:無綫兩劇一晚四宗綁架

無綫新劇《巨輪》啱啱喺星期一出街,套劇講兄弟倫理情仇,第一集就有場蕭正楠同鍾嘉欣俾人綁架嘅戲份,而綁匪之一竟然係蕭正楠大佬,亦即係嘉欣BB嘅舊愛陳展鵬,劇情好似幾離奇刺激咁喎!

不過,唔知係咁啱得咁橋定係冇橋,接住播嘅《神鎗狙擊》,一個鐘頭內就有三場綁架戲,第一round係周海媚(海味)俾人綁架,好彩俾張兆輝救出,不過跟住兩round就成功綁架咗楊愛瑾(Miki)同海味!兩劇嘅綁架贖款都係五千萬,不過Miki就值錢啲,贖款要美金,相反蕭正楠只值五千萬港幣。無綫一日兩劇有四場綁架戲,都可以媲美當年羅樂林一日死七次嘅紀錄!
《神鎗》監製關永忠都笑住話:「我喺屋企由8點鐘睇電視,睇到都覺得好無奈,呢啲係公司安排,我又冇睇晒其他劇,咁啱同一日播,人生同戲劇一樣,都係好多巧合,真係有咁啱得咁橋!」

橋段都係幾味

兩個鐘有四場綁架戲又確係多咗,唔通一句「如有雷同,實屬巧合」就過到骨?網民仲發現近年無綫好多劇嘅橋段都係嗰幾味,強姦戲就有《名媛望族》嘅楊怡、《雷霆掃毒》嘅徐子珊、《法網狙擊》嘅高海寧、同埋《天梯》嘅陳茵媺。至於《真相》嘅李司棋同《心路GPS》嘅劉蔚萱都俾人虐打,真係「巧」巧合囉!
版主:陳基征

逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://add.appledaily.com 睇番足本網上版,除咗有專訪外,仲有好多時裝靚嘢睇!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載