蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年09月30日
馬上成為壹會員

《飛虎II》頻生意外逐個傷
馬神失手 嘉欣爆缸狂喊

無綫新劇《飛虎II》接連發生意外!昨日在屯門拍攝爆破場面,馬德鐘(馬神)及鍾嘉欣意外受傷,因馬神失手而慘變撻生魚的嘉欣BB,跌落地時左手被磨去一塊皮肉爆缸,盆骨撞傷,痛極狂哭,馬神的膊頭亦撞瘀!事後二人僅休息20分鐘,死頂拍完這場煞科戲才去看醫生,嚇到魂飛魄散的嘉欣BB,只以搖頭及點頭回答問題!

相關新聞:禍不單行:飛虎受傷名單

由馬德鐘、鍾嘉欣及胡定欣等主演的《飛虎II》,開拍以來多災多難,藝員輪住受傷!昨日劇組在屯門的藍地貨櫃場拍攝煞科重頭戲時,馬神與嘉欣BB亦臨尾香同告受傷!昨日拍攝兩場重頭戲,包括吊威吔及爆破戲,劇情講述奸角胡定欣脅持嘉欣BB,馬神則英雄救美,拍吊威吔戲時三個都有替身,嘉欣BB的替身是功夫新星何佩珉,威吔戲順利完成。

小休片刻繼續拍

之後拍爆破戲時,馬神抱起嘉欣BB逃離現場,身後雜物爆炸,雖然之前做足準備,馬神亦信心十足,怎知第一take已出意外,馬神向前跑了四、五步後,身後雜物按時間爆炸,馬神卻失重心向前仆倒,甩手將嘉欣BB摔落地下!慘變撻生魚的嘉欣BB手腳被擦損,左手掌被磨去一小塊肉,右手臂及盆骨亦撞傷,馬神為免壓到嘉欣BB,以手掌直接着地,故右手踭及膊頭受傷。

相關新聞:王君馨腳傷未癒死撐

意外發生後,胡定欣與工作人員大為緊張,即時用清水幫嘉欣BB洗傷口,嘉欣BB痛到標淚狂哭,仍不忘慰問馬神。監製林志華即急停拍攝,叫兩人上車休息,拍完即去睇醫生,但二人在車內休息20分鐘後,稍事包紮的嘉欣BB繼續拍攝,問到傷口是否很痛?驚魂甫定的她只搖頭,再問驚不驚及是否頂得住?她就眼紅紅點頭,跟着再次哭了出來,平復情緒後埋位拍攝。上次嘉欣BB在《玩嘢王》扮喊成功整蠱觀眾,想不到今次變真哭!

冇買保險頂硬上

而貼了膠布的馬神則說:「膊頭有啲痛,因為爆炸時失重心,自然反應傾前咗,唔好意思,首先要同嘉欣道歉。」胡定欣慰問完嘉欣BB後說:「意外真係避免唔到,總之做足安全措施!嘉欣冇嘢,只係嚟得太突然,最緊要啲骨冇事,嚇親箒。」
拍攝前嘉欣接受訪問,被問拍危險戲可有買保險?她說:「平時有買,但冇為今日買,做危險動作有啲驚,自己會小心啲,如果好攰會同監製講,今日有替身幫手拍吊威吔,唔使擔心。」嘉欣BB事後到醫院接受治療,擺勝利V字手勢,並在微博報平安:「大家不要擔心,我平安,我OK!」至於馬神收工後換衫,發現膊頭腫了及擦損,骨有些痛,昨晚由老婆陪往醫院檢查。此外,馬神前晚與老婆到尖沙嘴擔任仁愛堂活動嘉賓,提到無綫劇《神鎗狙擊》劇情遭網民狂踩誇張,馬神主演的《飛虎II》也是講飛虎隊,問到《神鎗》是否不合理?馬神說:「咁犀利?大家風格唔同,我哋跟番上集,故事豐富寫實。」
採訪:張俊銘、楊潔雯
攝影:黃偉雄

逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://add.appledaily.com 睇番足本網上版,除咗有專訪外,仲有好
多時裝靚嘢睇!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載