› 選擇地區
三藩市
紐約
洛杉磯
其他美國地區
香港 台灣 北美
 
2013年10月06日

電戲道:彭氏兄弟逼上廣州

彭順(左)與彭發現在收起任性,拍一部紮實的災難片,藉危急關頭展現人性最真實一面。
攝影:葉君海

老實說,《逃出生天3D》是香港久違的火災電影,火光處處的確刺激,可是電影背景為廣州,劉青雲和古天樂穿起印有「廣州消防」(簡體字)的消防員制服時,難免有點突兀。本以為又是電影為直指內地市場而「接地氣」,殊不知是一個逼上梁山的故事。導演彭氏兄弟(彭順、彭發)希望拍一套大規模火災片,要放火燒整棟大廈之餘,亦希望能有多輛消防車及真消防員在場協助拍攝。「你話呢啲要求,喺香港有冇可能吖?」彭順這番話擲地有聲。
撰文:文國駿

《逃出生天3D》現已上映

彭氏兄弟自合作拍攝《無聲火》開始到其後的《見鬼》,已被筆者納入鬼才一類,他們拍的電影不盡是叫好叫座,有時故事內容亦較薄弱,但較偏鋒的題材總能引起話題及有一群忠實擁躉。日前二人於將軍澳接受本報專訪,宣傳二人新作《逃出生天3D》,這對孿生兄弟甫坐下便同樣的點了熱檸蜜,邊喝邊講述拍攝《逃》片的原因,彭發表示:「香港好耐都冇出一套講火嘅災難片,而且我哋兩兄弟一向都好有興趣,就開始着手籌備,不過拍火真係好難,你唔會知啲火點走,要每個步驟都好小心,我好欣賞動作指導林迪安嘅態度,佢一絲不苟,因為出少少意外都死得人,我哋當然希望拍攝出嚟效果好,但安全一定係大前提。」

司徒錦源遺作

彭氏兄弟過往作品在畫面調度或拍攝上一向高水準,可是在故事內容方面卻為人所詬病,情況尤以數年前的《風雲2》最為嚴重,然而今次《逃》片在故事上落足功夫,除了特意找來張艾嘉助陣,為片中女性角色加入新角度外,劇本方面又找來司徒錦源執筆,談到這位去年10月因病離世的金牌編劇,彭發表示:「佢真係冇得頂!」彭順則坦言過往他們所拍攝的電影較偏較任性,到近年他們才驚醒是時候結束任性,要拍一部紮實的電影,彭順說起來滿有信心,他謂:「我哋以前係任性,想拍啲自己鍾意嘅嘢,做導演都係因為咁咋嘛,我哋一樣可以講得好個古仔。」
筆者直接向彭氏兄弟道出有不少觀眾覺得電影以廣州為背景令人投入度不足,彭順先表示:「其實電影故事中心係講人性,喺火場入面最真實一面,各人唔同嘅心理狀態等等,呢啲嘢廣州、潮州甚至非洲做背景都係一樣。」解釋雖然合理,但彭順其後所說的才是以廣州為背景的最大原因,他謂:「我哋想拍一套大型火災災難片,要放火,又要好多架消防車同真消防人員喺現場協助拍攝,仲要封街係咁射水,你話呢啲要求喺香港有冇可能?封咗條彌敦道得唔得?冇可能全部用特技,呢啲場景要真拍先好睇。」

真3D效果突出

戲中不少大場口,問到二人哪一場拍攝難度最高?二人不約而同地表示:「一定係ending啲水沖出嚟嗰場,我哋嗰一場戲拍咗幾日,fill滿一缸水要45分鐘,我哋試位都試咗好多次,拍時又要唔同角度拍幾次,可以諗吓嗰度用咗幾多個45分鐘,次次拍完個take全場都唔敢出聲,等我哋叫OK。」
近年很多電影以3D自居,可是拍出來的效果卻令人失望,甚至可以「假3D」來形容,而今次《逃》片亦是打正3D旗號,彭順說:「其實3D電影一定係大勢所趨,而香港仲未係好多觀眾接受,睇完覺得頭暈就係因為太多假3D電影,佢哋係2D拍攝後期先用3D製作,距離感會差咗好多,所以睇完會唔舒服,同埋效果唔突出。」


足本收睇《亂噏24》x 卓韻芝;緊接歡迎「宇宙最強」甄子丹!
周一至周五《亂噏24》預埋你: http://bit.ly/appletalk24

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載