› 選擇地區
三藩市
紐約
洛杉磯
其他美國地區
香港 台灣 北美
 
2013年10月07日

家人好姊妹幫度難關 肥媽三度落淚

葉麗儀、陳潔靈和肥媽瑪利亞前晚在紅館演出「3個女人1個墟2013唱過界演唱會」,當中陳潔靈最性感,但兩件歌衫均不慎露出胸墊。三個女人曾傳不和,在台上互相寸嘴,肥媽唱《小草》激動地說:「好多人自覺懷才不遇,但香港人唔死得,努力野火吹不盡,春風吹又生。」陳潔靈不禁說:「你可以做特首!」肥媽認真地說:「呢份工打死都唔會做,我叫啲仔同孫唔好做賊同特首,如果唔係冚家俾佢反轉。」陳潔靈似乎擔心她講多錯多便說:「你講嘢好有氣派,但轉一轉話題,唔係佢唔收口。」

腫瘤6厘米大

子宮生瘤的肥媽三度落淚,她感觸地說:「今次可能係我最後一次喺紅館做騷,有朋友冇時間見面食飯,今晚專登叫佢哋嚟睇,當最後一次演唱會。」陳潔靈圖打圓場叫肥媽自己開,肥媽答道:「開玩笑咩!」肥媽透露兒孫有來支持,四代同堂樂也融融,其中一名孫仔在台邊獻吻,不少粉絲派利是及送花。肥媽唱《Mama I Love You》時哭着說:「我六歲已出嚟做小販同『咕喱』,好多人幫過我,特別係家人,有病冇同佢哋講,係怕佢哋擔心,但我做錯乜,佢哋都會支持我。」肥媽唱《友誼之光》又感動到喊,安哥時三人拖手合唱《明星》,葉麗儀感觸說:「走過咁多段路,好彩有咁多好姊妹陪住,天下無不散之筵席。」肥媽又再爆喊。而陳潔靈隔空與張國榮合唱《誰令你心痴》後說:「10年了,miss you Leslie and Anita!」

完騷後,肥媽透露下月中會入院切除腫瘤,腫瘤有6點幾厘米大,至今未睇報告,未知良性或惡性,她說:「橫掂都要切,老公好嬲呀,叫我唔好做演唱會,切咗先。但我覺得吉人自有天相,實冇事。」陳潔靈則否認不和傳聞。
採訪:王連連
攝影:陳俊強


足本收睇《亂噏24》x 卓韻芝;緊接歡迎「宇宙最強」甄子丹!
周一至周五《亂噏24》預埋你: http://bit.ly/appletalk24

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載