蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年10月24日

大企劃:想你陳百強

明日是陳百強逝世20周年紀念日,英年早逝的他令親友歌迷惋惜,眼淚在心裏流。

「長夜空虛使我懷舊事
明月朗相對念母親
父母親愛心柔善像碧月
懷念怎不悲莫禁
親恩應該報
應該惜取孝道
唯獨我離別無法慰親旁
輕彈曲韻夢中送」
陳百強《念親恩》
93年10月25日,在醫院昏迷了一年半的陳百強(Danny)與世長辭,結束璀璨短暫的紫色人生,劬勞未報!轉眼20年,白頭人送黑頭人的陳爸爸(陳鵬飛)已屆鮐背之年,很多前塵往事都忘掉,但忘不了Danny的歌聲:「佢支支歌都好好聽,𠵱家啲人唱得唔及佢。」
撰文:余燕儀

這天,約了陳百強爸爸陳鵬飛在他位於中環的錶行做訪問,Danny的同父異母大哥陳百靈陪着父親。陳爸爸的辦公室掛了Danny的相片和紀念郵票,Danny走了20年,只剩下舊照陪着老父!陳爸爸說:「Danny細個鍾意唱歌,鍾意作曲,支支歌都好聽,𠵱家啲人唱得唔及佢。」當年Danny未完成學業便入行,陳爸爸沒反對:「我梗係贊成佢入行,冇理由反對佢鍾意嘅嘢,我冇阻礙佢。」

相關新聞:難忘你的十件事

陳父以子為傲

陳爸爸愛粵曲,跟Danny一樣喜歡音樂,父子性格是否相似?陳爸爸說:「我睇唔到,佢平時傾講唔多,都係內向嗰類,我哋冇傾心事,佢有幾個兄弟,但唔同阿媽生,不過兄弟家姐好融洽,佢細個都聽話,冇乜曳事做出嚟。佢係鍾意唱歌演出,我有睇佢演唱會,嗰時演唱人少,𠵱家雖然多咗好多人,但我都係鍾意聽佢嘅歌,《偏偏喜歡你》、《一生何求》,真係好嘢。」
提到當年Danny昏迷入院,陳爸爸說:「我時時上去睇佢,但佢喺邊間醫院、點樣昏迷我都唔記得囉。」陳哥哥對爸爸說:「食藥飲酒。」陳爸爸輕嘆:「好可惜!佢30幾歲之嘛,真係好遺憾,咁細年紀唔喺度,如果喺度𠵱家唱歌幾好呢,佢演唱我去聽吓,真係驕傲囉,香港出名演唱地方係乜?」陳哥哥答:「紅館。」陳爸爸搖頭說:「唉!真係好多嘢唔記得,年紀大,唔好意思!」是否仍記得Danny的樣子?陳爸爸指着相片說:「記得,佢啲相喺度。」
陳百靈是Danny的異母哥哥,他回憶舊事說:「嗰時佢成日嚟錶行陪爸爸上陸羽飲茶,佢好孝順,我哋雖然同父異母,但兄弟感情好好,細個一齊玩,有派對叫埋佢去。佢好鍾意表演,好似做科騷咁跳吓舞。」對於弟弟變得性格內向,陳哥哥說:「完全唔明白,佢讀書又非常好,嗰時喺聖保羅可能壓力大,自己要求去美國讀書,發覺出面又唔適合,之後好快返嚟,嗰時開始少啲嘢講,但同朋友非常好傾,成日見佢講電話半個鐘頭以上,但同屋企人反而唔講咁多,不過佢好想威畀阿爸睇,所以喺電視台唱過粵曲。」
問Danny曾否帶女友返屋企?陳哥哥說:「冇,佢從來唔帶朋友返屋企,我哋完全唔知佢社交,佢唯一飲茶時成日講:『我約咗張曼玉、鍾楚紅走先。』其他唔知佢有乜嘢朋友。」對於Danny服藥飲酒入院,陳哥哥嘆氣說:「完全唔知佢有咁嘅傾向,唔知佢有乜嘢病要食藥,可能事業上冇咁鋒芒,個心更加唔舒服,個人抑鬱啲。」

為人內斂易抑鬱

陳哥哥指當年接到醫院和Danny經理人陳家瑛電話,才知道發生這件不幸事,他說:「真係好愕然,佢哋話Danny唔記得自己食咗藥,飲咗酒上腦昏迷,屋企人成日輪流上去睇佢,試吓同佢傾偈,有啲大師話自己好叻自動請纓醫佢,但變咗植物人好難醒番!佢走嘅時候樣子變化唔大,只係冇得郁,肥咗啲,五官冇乜走樣。」
有傳Danny的生母因欠債而離開香港,陳哥哥指她現身在內地,跟爸爸離異後已很少聯絡,他說:「Danny生前同媽咪好多嘢講,佢媽咪比較了解佢。」
陳哥哥還大讚歌迷非常好,他說:「Danny忌辰、爸爸生日,歌迷都會請爸爸飲茶,又幫Danny搞好多聚會,好難得20年仲咁長情,真係要讚。」

相關新聞:眼淚為你流

生平:一生何求

「情歌王子」陳百強是第一代偶像派唱作歌手,他標誌着80年代粵語流行曲的輝煌史,那年代聽歌的,有誰不識他?Danny於1958年生於香港,自小受父親薰陶而醉心音樂,又憑帥氣外形及風度翩翩的氣質,成為學校風頭躉。70年代末,Danny先後參加無綫的流行歌曲創作歌曲邀請賽、山葉電子琴大賽並奪獎項,79年正式簽約EMI,展開歌唱生涯。
Danny的歌聲未必最好,但總有種獨特的脫俗味,連歌迷都像感染到他的貴氣。首張個人專輯《眼淚為你流》一炮而紅,之後轉投華納推出的《幾分鐘的約會》、《有了你》、《傾訴》及《偏偏喜歡你》等全錄得白金成績,亦是樂壇頒獎禮的常客。
超級完美主義者Danny對自己要求很高,亦時刻與人比較,難免鑽進牛角尖,要借助酒精麻醉。縱然身邊有很多圈中朋友如鍾楚紅、周潤發、梅艷芳和鍾鎮濤等愛錫他,但始終無法開解他。
92年5月18日,Danny被發現於寓所昏迷,送院搶救,留院17個月後離世,結束了短暫但璀璨的35年人生,並留下《念親恩》、《漣漪》等永恒曲目。
撰文:馮國康

足本收睇《亂噏24》x 陳慧琳;之後有請搞笑孖寶鄭中基谷德昭玩轉再玩轉!
周一至周五《亂噏24》約定你: http://bit.ly/appletalk24

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載