蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年11月02日

日收百萬票房 殭屍熱

【殭屍翻生之全城效應】黃色道袍、桃木劍、黑狗血、白糯米這些殭屍片的專有名詞,近日因麥浚龍(Juno)處男執導的《殭屍》而再度炒熱,電影上映八日已收720萬港元,每日平均收接近百萬,入場人次超過12萬,令沉寂二十多年的殭屍片翻生,掀起一片熱潮!《殭屍》題材黑暗,探討人性最陰暗一面,角色如錢小豪、鮑起靜、陳友及鍾發都圍繞着「回家」主題,贏盡口碑。殭屍回家了,港片能重拾光輝嗎?

相關新聞:驚心動魄:七大精采場面

明月吐光,陰風吹柳巷。當《殭屍先生》主題曲《鬼新娘》徐徐奏起,觀眾腦海閃過一張張久違的臉,林正英、許冠英、錢小豪及陳友這班昔日殭屍片鐵腳,雖然「雙英」已作古,但Juno找來後兩者聯同鮑起靜及惠英紅兩大影后,配合《咒怨》的日本恐怖電影大師清水崇任監製,攜手炮製《殭屍》,向80年代殭屍片致敬。電影接連獲邀參加威尼斯、多倫多及倫敦的國際電影節,上周四始於本港上映,截至前日已錄得720萬票房,入場人次超過12萬,成績彪炳,更掀起新一輪殭屍熱。

Juno否認搵替槍

網上影評讚多過彈,尤其鏡頭運用、場景及美術設計令人讚賞,甚至有網民質疑不是出自Juno之手,他日前接受本報專訪時聽罷微笑說:「首次執導,尤其之前一直做歌手同演員,別人有呢個疑問係絕對能夠理解。正如小說家突然做導演一樣,相信係世俗一種見解,換個角度都係讚美。電影從來都係長跑,路仍很長,繼續努力。」他坦言由於前期很趕,沒時間參考其他殭屍片:「好多嘢都係即時、係發自內心對世界嘅睇法,所以冇參考邊一段係邊套戲。《殭屍》係有好濃烈我嘅味道,我哋刻意架空咗個世界,由零開始,即係一粒衫鈕、一張枱要用乜嘢色調,都返去個導演度。」他透露因開工時長期低頭睇mon,積勞引致頸傷,時常有火燒感覺,要找醫生啪骨及按摩。

相關新聞:我是誰:富二代愛Cult片

海外反應熱烈

據悉《殭屍》海外市場已賣八成,新加坡、馬來西亞、台灣、韓國及美國,還洽談歐洲市場,Juno說:「成績唔錯係估唔到,對新導演嚟講係好幸運。」問他會否棄歌從導?他笑言沒所謂:「無論乜嘢都係代表我,心中根源都係創作,專輯其實已經做好幾個月,仲搵咗荒木經惟幫我做CD cover。」會否乘勢密密拍?他說:「創作唔可能咁去push,我只係想每次都有新進步,唔想困住自己喺一個角色。初初做殭屍,好多人話好危險,覺得殭屍係大戰式、搞笑、節奏要好快,但係我想講人生。」
此外,Juno、鮑姐、錢小豪及陳友等《殭屍》台前幕後,前晚在尖沙嘴舉行慶功宴,但監製陳自強未有現身,令人揣測是否因傳與Juno不和有關。Juno說:「嚟嘅途中有同佢通電,契仔契爺關係冇變,唔係建基於金錢上面,佢幫我好多。」但承認雙方現在不是合作夥伴。
採訪:盧妹、文國駿
攝影:陳志嵐

足本收睇《亂噏24》x鄭中基谷德昭;跟住有新紥師妹楊千嬅駕到!
周一至周五《亂噏24》約定你: http://bit.ly/appletalk24

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載