› 選擇地區
三藩市
紐約
洛杉磯
其他美國地區
香港 台灣 北美
 
2013年11月02日

馮仁昭四圍超:舊拍檔玩互𠝹 展鵬浩然爭嘉欣BB - 馮仁昭

鍾嘉欣同展鵬合照時,表現尷尬。

鍾嘉欣、陳展鵬、黃浩然、唐詩詠同楊思琦,噚日喺將軍澳電視廣播城為新劇《大藥坊》試造型,嘉欣啱啱同展鵬喺《巨輪》飾演情侶,以前又試過同黃浩然做一對,呢一次又話佢會周旋喺展鵬同浩然之間,展鵬話唔擔心觀眾會覺得悶:「今次仲有唐詩詠加入四角戀,我同嘉欣喺尾聲先會有感覺。」嘉欣就話覺得呢次角色對佢嚟講好有難度:「我會有好多藥名同中醫術語嘅對白,真係12級難度,𠵱家收咗5集劇本,惟有靠死背。」

思琦剃囡囡頭

見到嘉欣同展鵬喺合照期間好尷尬,嘉欣即刻耍手兼擰頭話:「冇呀!只不過覺得着咗套戲服,覺得自己好高貴啫,我哋喺化妝間都有傾偈。」有傳何哲圖(Herman)有意將愛將嘉欣捧為星夢一姐,嘉欣話:「我冇聽過,一定係流料,Herman一視同仁,冇一姐同小姐之分。」
四年冇拍劇嘅楊思琦今次將會做杜燕歌嘅填房,仲會同敖嘉年出軌,問到佢會唔會有突破演出?佢話:「只要出得街嘅電視尺度都會拍,如果擔心太多乜都唔使拍。總之今次有份拍劇好開心!」佢仲主動講囡囡嘅頭髮太稀薄,趁天氣未凍幫佢剃光頭,希望新生嘅頭髮可以濃密啲!」

另外,十幾年冇返無綫嘅潘志文,今次被邀請演出,佢笑話自己戲癮大,所以今次同無綫部頭形式合作,但係同亞視關係好好嘅潘翁,唔知遲啲會唔會幫亞視拍劇?佢話:「一定有機會,呢個世界係圓,我做咗呢行幾十年,個個都係朋友。」
撰文:馮仁昭

逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://add.appledaily.com 睇番足本網上版,除咗有專訪外,仲有好多時裝靚嘢睇!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載