› 選擇地區
三藩市
紐約
洛杉磯
其他美國地區
香港 台灣 北美
 
2013年11月14日

500萬獎金獎品娛賓
無綫台慶掟錢抗熄機

【電視大戰之絕招晒冷】無綫《萬千星輝賀台慶》將於下周二(19日)舉行,原本一件盛事,卻因政府漠視民意不發牌予王維基,激怒網民發起「萬千熄機賀台慶」行動;日前陳百祥(阿叻)狂言戲稱台慶收視若跌到兩、三點,便由將軍澳跪地跪到返屋企,挑機言論如同火上加油,令無綫十分頭痕。

相關新聞:志雲曲線踩無綫劇

搵阿倫撐場

為挽回劣勢,無綫今午將舉行記者會,晒冷式公佈台慶當晚節目內容、嘉賓陣容及送出的獎金獎品。據悉今年台慶兩個半小時節目將以大型晚宴形式進行,除全台逾百藝人外,更破天荒邀請譚詠麟、謝安琪、G.E.M.等30多位歌星做晚宴的座上嘉賓,增添可觀性。表演方面,有林亼、徐子珊率朱璇、岑麗香等十男十女表演空中舞;陳百祥與葉翠翠、呂慧儀等玩花式足球,還有星夢幫獻唱、阮兆祥與眾男打鼓,及《老表.唔係呀嘛》演員王祖藍、王菀之和林盛斌等演出。
過去數年台慶的獎金獎品被指年年縮皮,由送車送內地樓,改送現金及獎品。去年送出總值約150萬元獎金獎品,今年卻加碼至500萬,最大獎是100萬獎金獎品,其他還有價值80萬內地樓、20多萬簽賬額及HTC智能手機等。除藝員外,出席歌手都有份參與,隨時有機會抽中參加遊戲,屆時觀眾亦可透過TVB Fun,參加遊戲獲大獎。監製陳旭亮被問可擔心收視,昨在電話中回應:「會盡力做好,冇諗咁多。」

子珊怕趕客

謝安琪前晚在九展出席活動,她透露不會隨何哲圖加入無綫的星夢唱片公司,但與無綫仍關係良好:「台慶都搵我幫手。」黎耀祥和佘詩曼前晚在金鐘出席晚宴,祥仔透露台慶會表演魔術。被問到台慶熄電視行動,祥仔謂:「唔代表一世唔睇,各自表態亦冇壞。」阿佘則說:「我兩年冇返嚟,唔好熄。」
此外,徐子珊和岑麗香等昨日在將軍澳電視城綵排台慶,子珊表演不乏高難度動作,提到網民號召當晚熄電視,她無奈地說:「最好唔好喇,排得咁辛苦都係想表演畀觀眾睇。」被問到會否性感上陣吸引觀眾睇電視後說:「我要吊威吔,怕太性感會搞到啲人投訴,接受唔到重口味。」她亦力撐叻哥,稱對方只是比喻。
採訪:黃曉妍、馬健華、王崇穎
攝影:陳俊強

街訪:獎金加碼拒開機

網民發起無綫台慶夜再熄電視,加上阿叻的跪地挑機論,激發更多人響應,無綫將以500萬獎金獎品吸引觀眾,昨本報記者在中環抽樣進行街訪,市民均表示支持熄機,不受獎金獎品打動。

丁先生:「嗰日我會熄電視,對TVB啲節目興趣不大,反而上網多選擇,質素好緊要,我睇電視係為娛樂,如果為錢嘅更加唔會睇。」

容小姐:「我係無綫fans,不過都支持熄電視,近期啲電視質素不堪入目,加上牌照風波,我會支持。我覺得叻哥咁樣講絕對令更多人響應熄機。」

李小姐:「我會響應,近年唔係好滿意無綫嘅節目,趣劇𠵱家變咗做鬧劇,好多年冇睇,就算嗰晚啲獎金獎品加碼唔會吸引到我。啲人就係唔鍾意一台獨大,咪熄機畀你睇!」
採訪:卓寶花
攝影:黃文偉

足本收睇《亂噏24》x 楊千嬅;緊接落嚟 Miriam 繼續同你談談情, 吹吹水!
周一至周五《亂噏24》約定你: http://bit.ly/appletalk24

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載