› 選擇地區
三藩市
紐約
洛杉磯
其他美國地區
香港 台灣 北美
 
2013年11月15日

捐300萬𢱑台慶收視 阿叻淆底

為撐港視發牌,有網民發起「萬千熄機賀台慶」行動,陳百祥(阿叻)擦鞋護主,近日連珠發炮發表爆炸性言論,由起初「收視得兩、三點便跪地返屋企」,繼而加碼到「死咗佢」,激發不少市民熄機決心。阿叻似乎淆底,擔心單點收視成真,昨日出席台慶記者會時,諗計要無綫台慶有30點收視就捐300萬給慈善機構,並揚言無綫唔捐自己捐,博收視反彈。

相關新聞:全城熱話--G.E.M.:介紹急救員畀阿叻

現年62歲的陳百祥出名寸嘴,最近為撐無綫竟口出狂言,公然向電視迷挑機,指無綫台慶收視無可能得兩、三點,即有網民發起網上「尋人」,冀聯絡全港800戶參加收視調查的家庭,發動他們響應熄電視行動。未知阿叻是否感到事件鬧大,昨日在將軍澳電視廣播城出席《萬千星輝賀台慶》記者會時,突在台上宣佈要捐錢撐收視,他說:「一台獨大唔想嘅,人哋同我玩點數。我𠵱家喺台上宣佈,如果台慶節目任何時段有30點(約193萬人),我就叫TVB捐300萬出嚟,希望TVB撐我,如果唔係我咪喺TVB騷錢扣囉!」

「每多1點就加10萬」

阿叻在台上多次呼籲:「撐大家開電視呀,睇電視、睇台慶!」並做出扭開電視機手勢,連拍檔陳芷菁都感到阿叻淆底,她說:「你係咪好驚呀?你講咗六次嘞!」阿叻透露已叫汽車老闆加碼送多一部汽車,到時藝人和家庭觀眾各抽一部,擺明用獎金獎品吸收視,他說:「熄機負能量,開機幫到人。」
阿叻在台下續狂擦TVB鞋:「我回饋同擦鞋係啱嘅,TVB養大我,等如阿爸養我,唔通我會鬧佢咩?啲錢暫時未知捐去邊間慈善機構,如果每多1點就加10萬,唔得就喺我人工度扣,我返嚟做20個騷就300萬,咁你哋知我幾多錢一個騷啦。我希望捐夠400萬㖭,唔夠我就出街搵人『揼心口』,籌款我最叻!」

相關新聞:阿叻「跪回家」路線圖

問無綫是否已答應?阿叻說:「我上台講完冇人抗議就係,我唔話得事邊個話得事呀?冇理由叫鄭俊弘出嚟講,雖然佢𠵱家都好話得事。」他再做開機手勢,並囂爆說:「吹咩!」他表示不相信「尋人」網有逾萬人Likes,但截至昨日,該網已近二萬個Likes。對網民不是想他死,而是要他輸掉要「找數」下跪,他說:「如果係咁有力熄機我咪死咗去囉,以後唔撈電視,到時唔撈定死咗冇人知。」對無綫劇被評質素下跌,他晒爛透英文說:「呢度少林寺,張曼玉、華仔充斥華人市場,有90%係TVB出去,乜嘢叫質素差呀?無綫請好多新人,我都想退休好耐,但後生上嚟又跌番落去,我又咁受歡迎冇計,曬命英文係咩呀:put my life under the sun!

陳芷菁:覺得佢係驚

無綫非戲劇製作總監余詠珊表示,今年的獎金獎品是歷年之冠,共值約700萬元。問阿叻揚言再捐300萬是否已落實?余詠珊說:「係好提議,今日叻哥同我哋傾過吓,希望多啲人睇節目啦。」事後陳芷菁說:「𠵱家年輕人鍾意同大人行相反方向,真心講,我覺得佢係驚。」黎芷珊說:「總之籌到款可以幫到人,有信心可以去到300萬。」
採訪、攝影:卓寶花

足本收睇《亂噏24》x 楊千嬅;影帝張家輝接力上陣!
周一至周五《亂噏24》約定你: http://bit.ly/appletalk24

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載