› 選擇地區
三藩市
紐約
洛杉磯
其他美國地區
香港 台灣 北美
 
2013年11月20日

一個台慶 悲喜兩極

【萬千熄機賀台慶】天國與地獄。
這邊廂,300多名無綫小生花旦盛裝在將軍澳電視廣播城前慶祝台慶,一片歌舞昇平的假象。
三街之隔,港視廠房地盤空無一人,這裏曾滿載夢想與期盼,如今淪落得冷冷清清,荒涼但很真實。
由無綫過檔港視的陸駿光,幻想一天港視有屬於它的台慶,他拿着蛋糕在港視前默默唱出「Happy Birthday to HKTV」,可憾是有誰人聽到?

相關新聞:高海寧沈卓盈胸頂胸

香港電視不獲發牌,全城震怒,無綫昨晚慶祝46歲生日,300多名小生花旦力撐《萬千星輝賀台慶》,網友卻發起熄機贈興,連日陳百祥(阿叻)牙擦擦指收視點跌到兩、三點便由將軍澳跪回家,其後又激進死諫,甚至借慈善捐款為名谷收視。雖然坊間民怨沸騰,無綫懶理反對聲,昨晚燈火通明在將軍澳電視廣播城開騷,整晚歌舞昇平,相反三街之隔的港視廠房地盤遭棄置一遍荒涼,雜草叢生,港視一日沒取得牌照,永遠都無望搞台慶。
港視藝人艾威、郭鋒、陳霽平和黃澤鋒等昨日繼續支持「萬千熄機賀台慶」,而港版「半澤」陸駿光孤伶伶在港視葵涌辦公室拿着蛋糕吹蠟蠋,他還是奢望港視可有屬於自己的台慶。

郭鋒:節目年年一樣

不少由無綫過檔港視的藝人都曾參加過無綫台慶,想當年無綫藝訓班畢業的陸駿光,03年曾為台慶表演,他昨晚仍需為港視劇《Night Shift》開工,陸駿光在葵涌港視辦公室等候出發時,黯然捧着蛋糕許願,落寞唱着「Happy Birthday to HKTV」,問陸駿光可期待港視也有台慶?他說:「入得港視,大家都有夢想,想節目俾人睇到,想台慶慶祝我哋嘅成果。」面對無綫開心賀壽,陸駿光欷歔說:「唔識戥人開心,因為自己努力,連去俾人選擇嘅機會都冇。今晚我要開工唔睇,平日都好少開機。」如何看網民熄機的舉動?他說:「冇乜嘢感覺,我諗吓自己條路多過理其他嘢。」

相關新聞:馬明再現天然呆 凱琳走光突然來

郭鋒昨晚也支持熄機,他說:「以前喺無綫,台慶咪好似校慶咁,𠵱家離開咗都冇感覺。台慶節目年年一樣冇內容,又係糟躓人,睇都嘥我啲時間,不如出去睇場戲,或者買碟返嚟睇好過啦!」
身在外地的艾威昨也說:「好耐之前喺台慶表演,嗰陣劉家良師傅做指導,當時打完鼓跟住跳過個鼓,再嚟一字馬。今年台慶對好多人嚟講係難忘,TVB嘅員工,又或者香港嘅市民,都係充滿火藥味,我唔係咁想睇到呢個情況。」艾威也希望港視將來有台慶,證明港視已成立。

盼望港視也有台慶

曾於05年無綫台慶抽中當時價值28萬中山豪華洋房和10萬儲蓄戶口的陳霽平,現今已過檔港視,無緣再參加抽獎,她希望幸運可延續到港視開台後,再在台慶中獲獎,她說:「生日係盛事值得慶祝,如果有咁一日,對港視嚟講都係突破。」黃澤鋒曾於09年台慶中空寶,他原抽中現金獎,卻因早走被迫把獎金拱手給了高鈞賢,黃澤鋒昨說:「邊有咁多時間睇電視,我𠵱家有頭家,憤憤不平都要食飯,我哋冇梁振英咁惡,但王維基係好老細,希望大家齊心合力,有一日獲發牌慶祝台慶。」
採訪:丁寧、卓寶花
攝影:陳志嵐、黃偉雄、黃文偉

街訪:巿民齊齊估收視

究竟無綫昨晚台慶收視有多少仍是未知之數,會否低過3點要陳百祥(阿叻)認衰跪回家?還是過30點無綫要捐錢收場?且看看巿民覺得台慶會有幾多點收視。

金小姐:

我覺得15點,一定仲有家庭支持,因為佢哋有抽獎,我自己就一定會響應,本身自己都唔鍾意睇電視。

馬小姐:

19點,多數嘅青少年都會響應,但一般家庭,正常食飯都會開電視,同埋都係抽800個機盒,咁800個係經常睇,又點會唔睇。

湯先生:

大家會支持熄電視,支持香港電視,唔發牌又唔知乜嘢原因,但始終係有人會睇電視,所以我諗有24點。

陶小姐:

我話得2點,因為我想睇阿叻(陳百祥)跪地,大家都好想睇佢跪回家。

林小姐:

25點,咁樣無綫其實已經輸咗!因為熄電視行動,有好多唔睇電視,唔鍾意政治嘅朋友都話會響應,真係好大怨氣!

余小姐:

我覺得最少都有30點,我一定會睇台慶,因為有機會抽獎,雖然我係支持王維基,但都冇必要杯葛TVB。


逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://add.appledaily.com 睇番足本網上版,除咗有專訪外,仲有好多時裝靚嘢睇!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載