› 選擇地區
三藩市
紐約
洛杉磯
其他美國地區
香港 台灣 北美
 
2013年11月21日

「40點我就跪返屋企」
子華幫無綫打翻身戰

【電視風雲之矛盾對決】無綫46周年台慶遇上發牌風波,收視創十多年新低,連最近兩套台慶劇都被專業人士鬧爆失實,被網民批評製作事事旦旦。無綫為挽狂瀾作絕地反擊,下周一推出由「男神」黃子華主演的新劇《My盛Lady》,有網友發帖指是「矛盾對決」,子華新劇vs罷睇無綫,不知如何選擇?子華昨日在電話中力撐發牌,但笑言新劇收視有40點便跪回家。

相關新聞:福將帶挈:收視冇甩拖

近年無綫劇大不如前,早前有醫生、律師、警察等專業人士力數無綫劇沒做足功課,令劇情太多犯駁位。兩套台慶劇《On Call 36小時II》和《法外風雲》上周平均收視分別有26點(約167萬觀眾)和27點(約173萬觀眾),似難過30大關;一年一度的《萬千星輝賀台慶》也被陳百祥(阿叻)一句「跪地跪返屋企」拖累,不少人響應熄電視行動,令收視創十多年新低,平均只有29點(約186萬觀眾)。

子華:網開一面

無綫為挽聲威,惟有出動最強武器,找來闊別4年後回巢拍劇的黃子華出戰,下周一緊接《法外風雲》推出《My盛Lady》。一直以來子華是劇迷心目中的「救星」,主演過的無綫劇《男親女愛》、《棟篤神探》和《絕代商驕》等全部有收視有口碑。難怪有網民昨日在討論區發帖,直言這是一場「矛盾對決」,子華新劇vs罷睇無綫,不知如何選擇?網友酶酶說:「鍾意都唔睇咁矛盾?咪即係同人講自己係盲反!反TVB都係質素問題,我從來唔懷疑黃子華嘅質素,𠵱家係TVB請子華嚟救駕炸(咋)。」但也有網友Patrick Lee謂:「大是大非面前,睇少次都要。」又有網友建議逢廣告時段關機。近日網上流出約三分鐘《My》劇片花,當中有「剩女」徐子珊、細細粒陳嘉佳和王君馨顯露騎呢個性,子華則一貫又賤又無賴作風。

相關新聞:千里召喚:五大高登男神

對於這場「矛盾對決」,子華昨日在電話笑說:「我都睇到,有人仲唉……如果咁做(開電視)就大義滅親,好似當我好重要。」有傳《My》劇原定明年推出,如今被挑選打這場硬仗,是否回朝救駕?他說:「唔係,我都算夠運,忽然嚟到呢個風雲色變嘅時候。我當然希望觀眾睇得開心,全組人畀足百分之二千(心機),如果大家可以網開一面咪……哈哈哈。」對於被網友封為「男神」,子華說:「搞到希臘神話咁,其實我膽細,一百個人讚我,但一個人叫我『收皮』,我都淨係記得呢個,所以希望大家錫住我。」

力撐發牌給港視

問對收視有沒有信心?子華笑說:「唔知邊日同人講,如果有40點我就跪返屋企,講笑啫,搬去將軍澳住啦!講真我唔理點數,我心態係鋪鋪清,要純贏點數我就拍續集啦,就係想畀觀眾新鮮感。」雖然幫無綫拍劇,但子華仍撐港視發牌:「諗唔到乜原因唔贊成,等如我做棟篤笑,當然希望只有我一個人做,對我嚟講好合理;但如果對整個社會嚟講,梗係越多人做棟篤笑越好,大家聽到唔同聲音,但係咪競爭搞到啲笑話低落咗呢?我唔識點去解釋呢個邏輯嘞!」

對阿叻揚言2、3點跪回家,子華直言盤口開得太低,他說:「證明有人鍾意睇無綫,唔係我去亞視啦!」而他也選擇性看台慶:「我份人好偏心,子珊同祥仔(阮兆祥)同我拍劇就睇一睇,其他就分心啲。」昨日街訪中,不少市民撐子華,司徒先生說:「由細到大鍾意佢,希望今次劇本好睇,會為佢開電視。」但也有人唱反調,顧小姐說:「冇必要睇啲翻炒又翻炒嘅劇。」
採訪:林妃、譚倩宜
攝影:黃文偉

足本收睇《亂噏24》x 楊千嬅;影帝張家輝接力上陣!
周一至周五《亂噏24》約定你: http://bit.ly/appletalk24

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載