› 選擇地區
三藩市
紐約
洛杉磯
其他美國地區
香港 台灣 北美
 
2013年11月22日

張家輝鬼話連篇

【亂噏24 第20集】張家輝憑《激戰》飾演賤輝,成為明晚舉行的台灣金馬獎影帝大熱。演技已備受肯定的他,早前小試牛刀首執導筒,拍攝港產鬼片《盂蘭神功》,繼續向內地市場說不!《亂噏24》足本版逢周四晚上11時播出,讀者可在 http://bit.ly/appletalk24 重溫。
撰文:馮國康、Sidekick

相關新聞:林超賢挫折當鍛煉

張家輝的「化骨龍」搞笑形象太深入民心,掩蓋了他的演技,真正發掘他演戲才華的伯樂是杜琪𥧌。家輝在杜琪𥧌執導的《黑社會》中飾演「飛機」,戲路大轉變,觀眾終於意識到家輝可演陰沉角色。蔡瀾問他覺得杜琪𥧌跟面前的林超賢有何不同之處?家輝表示與林超賢默契最深,大家對電影的看法都近似,他說:「個個以為我拍親佢啲戲,梗係好抑鬱好唔開心,其實我拍佢嘅嘢最舒服,因為佢站喺演員度,幫手諗通晒成件事。」至於杜Sir,家輝笑說對方沒有劇本,每次都要猜度他的意思:「我每日去都唔知拍乜,大家每日拍嗰場估嗰場!」但他承認這些拍攝手法有好處,就是有新鮮感。他說:「冇乜話邊個啱邊個唔啱,大家各有方式。」黎智英(肥佬黎)問道:「咁佢有冇一開始將個大綱、個vision講晒畀你聽?」家輝答:「冇喎!現場有張紙嘅,寫咗啲字嘅,但最後要拍都唔係嗰張紙嚟。」

家輝記得當年拍《黑社會》,他曾向杜Sir提出想接觸相關人士,來模仿對方的行為舉止,但杜Sir不批准,認為太敏感,結果家輝要自己去幻想蠱惑仔的行為模式。林超賢說:「其實喺現實度,好多蠱惑仔係模仿番啲戲嘅角色!好似家輝咁,邊有人食匙羹㗎?可能真係去咬匙羹都唔出奇!大到人吖嘛。」

導演要兼顧多方面

家輝最近首執導筒,拍攝一部純驚嚇的鬼片《盂蘭神功》,肥佬黎說:「大陸上映唔到喎。」家輝稱自己在香港長大,對香港電影黃金年代有很多懷念,他覺得鬼片好像已被遺忘了,因此打算重拾昔日的感覺:「細個嗰陣,阿媽帶我去睇葛劍青套《女魔》,睇完之後,嘩,真係嚇咗我成年呀!」肥佬黎問他可有想過轉做幕後,家輝答:「我唔係好大野心要做導演。」他認為投資者都肯冒這個險,自己又有少少興趣,沒理由縮沙。家輝又覺得做導演太過複雜,要同時間兼顧不同東西,非一年半載便學得曉。
說到鬼片,肥佬黎即興問家輝可信這世上有鬼?他答:「我信神,當然信有鬼啦,鬼唔一定隻隻都害人。」肥佬黎追問:「見過鬼未?」家輝答:「咁又未喎,你見過未?」肥佬黎答得妙:「我都未見過神,所以都未見過鬼!」然後娓娓道出四、五歲時疑似撞鬼經歷。「有晚去廁所,廣州啲屋有條好長嘅冷巷,我聽到有細路仔喊,窒一窒,之後見到着綠色衫、黑色褲,一個大妗姐咁款抱住個細路仔行過嚟。」但肥佬黎又醒起當晚偷偷喝了酒,故質疑當時是幻覺:「大個咗我諗吓係咪嗰晚我冇去廁所呢?可能係發夢呢?將嗰個影像放咗喺個腦裏面呢?」肥佬黎提到年幼時充滿幻想,「講嘢自己都唔知真真假假」,更被人封為「黎大炮」,認真抵死。

輪到蔡瀾分享他的撞鬼經歷,當年他曾租住加多利山的嘉陵大廈,該處以猛鬼見稱,他憶述說:「夜晚黑啲傢俬砰砰嘭嘭響,我話如果有(鬼)快啲出嚟,傾吓偈囉!但唔出嚟。」張艾嘉亦曾住在該幢大廈,結果病到五顏六色,最後搬走,只有當差的陳欣健因煞氣騰騰才鎮得住。肥佬黎認識一對外籍母女,亦聲稱常在家見到鬼,當時她找來神父與駐港的梵蒂岡大使一起去驅魔,之後真的變得安寧。蔡瀾表示台灣的鬼怪比較形象化,他曾在半夜三更在鄉下趕路,中途見到有一台戲,只有一人在表演,周圍全部是墳墓,他說:「睇到你都驚!」這些表演者是受聘娛「賓」,怎倦也不能辭演。

尋回原始驚嚇感

家輝亦曾聽過一個鬼故事,話說有對年輕夫婦搬進九龍城新居不久,妻子開始生病,整個人沒精打采,連樣貌也變了,後來丈夫帶她看心理醫生,醫生一見到她居然勸她找個神父醫治。後來兩夫婦找來一位大嬸看風水,大嬸靜靜告訴他們無能為力,只吩咐他們在指定日子,帶齊護照、文件,然後永遠離開該址,兩夫婦照做如儀。後來妻子的病好轉,亦重拾昔日樣貌,才得知當日有女鬼上了她身。家輝當初拍鬼戲時,嘗試叫編劇接觸該對夫婦,但兩夫婦即時拒絕,因為不想舊事重提。

林超賢對這鬼故事相當有興趣,最想知為何心理醫生會勸該少婦搵神父幫手。家輝即時導演上身:「我諗個視點唔係擺喺鬼上身嗰個人度,係個心理醫生點會相信有鬼,於是追尋呢個subject嘅時候,上咗佢身。」林超賢覺得80年代有很多港產鬼片,在沒有強勁音響、沒有電腦特技,就算日光日白但都非常驚嚇,隨便數便有《再生人》、《靈氣逼人》、《凶榜》、《瘋劫》,他最想尋回這種最原始的驚嚇感覺。肥佬黎問家輝的《盂蘭神功》結局是怎樣?家輝亦不介意劇透:「既然我唔需要大陸市場,梗係鬼摧毀晒一切啦!」聽落也十分破格。

3款表情殺入金馬 影帝再挑機
http://bit.ly/talk242001

港產片商機處處 拍片如同印銀紙
http://bit.ly/talk242002

金馬前瞻 影帝品評大導演
http://bit.ly/talk242003

即興拍戲亂咁嚟 唔及殺手有條理
http://bit.ly/talk242004

做導演要萬能 家輝轉型好頭痕
http://bit.ly/talk242005

市場動盪難測 挫敗港人心理
http://bit.ly/talk242006

肥佬黎撞鬼?家輝教佢分人定鬼!
http://bit.ly/talk242007

半夜趕路經過墳墓 有人唱戲點算好
http://bit.ly/talk242008

日光日白拍鬼片 80年代最經典
http://bit.ly/talk242009

兩公婆間屋有鬼 老婆連樣都變鬼
http://bit.ly/talk242010

足本收睇《亂噏24》x張家輝;宅男女神謝安琪隆重登場!
周一至周五《亂噏24》約定你: http://bit.ly/appletalk24

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載