› 選擇地區
三藩市
紐約
洛杉磯
其他美國地區
香港 台灣 北美
 
2013年11月29日

一言棠:阿棠一言 - 歐錦棠

歐錦棠按真心說話,皆因只為四個字:「我愛香港!」

有人問我,𠵱家電視台風雲際會,人心惶惶,點解喺呢個時候幫《蘋果》寫《一言棠》?我即時略作思量,然後仔細一想,心裏自有主張,知道很多事不能直講,只能作個比方,於是,故事開始便是這樣:
某日收到電話響,記者朋友問安康,三言兩語入正題,問:「我哋娛樂版想搵人寫專欄,你幫定唔幫?」

勿學高官冇腰骨

當時心想:「寫完成年《功夫講堂》,諗住唔使揸筆日日忙,但係今次竟然寫娛樂,咁咪即係開正我嗰行?我份人一向愛思想,平日通常多數一個諗樣,即係『諗嘢個樣』,忽然身邊出現個『撒旦小棠』,對我笑口噬噬同我講,佢話:『儍佬!你平日已經夠忙,再寫埋報紙我包你發狂!加上有人發咗通告,幫你做埋決定唔接受壹仔採訪,如果你咁都肯幫,咁你唔係癲就係喪!』聽完佢咁講,個心即刻好似無風起浪,似乎好有道理,畢竟香港人最緊要搵食,冇理由咁笨同份工對抗。不過回頭一望,雖然撒旦小棠對我苦口婆心咁講,但唔知點解總覺得佢立壞心腸,皆因望落佢神態又如鷹似狼,做咗幾十年人見唔少貌似粗人但其實一條好漢,調返轉頭道理亦一樣,就攞我哋特首嚟講,競選嗰陣有求必應,選完之後萬事盡忘,簡直堅過飲孟婆湯!越諗越信唔得過,個心有如鹿撞,於是的起心肝,就學阿樹根咁講:『收皮啦你!』加埋語氣既狠夾狼,呢句功力真係嚇到撒旦小棠防不勝防,唔怪得鬧到王維基想出牌都冇行,撒旦更加唔在講,唔使出手佢已經投降。佢冇癮消失之後,我將問題再三思量,於是又回復一個諗樣,考慮是否應承之際,天使小棠出現身旁,笑面迎人畀忠告,佢話:『阿棠,凡事要考慮周詳,回覆毋須匆忙,因為男人講得出就要有擔當,千祈咪學高官,冇腰骨一味卸責推莊!』」

香港巿民冇得揀

講完化成一縷煙,天使返上天堂,只剩下一陣芬芳,我呆站兩眼茫茫,望真,原來我點緊香薰,所以至有芳香。
佢兩個走咗之後,我頭頂盞燈膽即刻發光,心裏有咗啟示,好似得到答案。佢兩個同時出現,原來比喻香港實況,你睇無論天使、魔鬼,行出嚟都差唔多樣,好難分出真偽,誰講真話誰在說謊?正如拉登都有知心友,耶穌咁好都俾人講,佔領中環就梗係壞人,反佔中就叫愛香港?話明發牌可以無上限,點解結果係三揀二咁悽愴?香港巿民無得選擇,究竟係一籃子因素定因為一言堂?
呢個就係香港嘅情況,正反表達都俾人鬧,凡事鍾意上線上綱,有時諗落真係有咁荒唐得咁荒唐,既然如此,雖然我不屬於任何黨,亦冇理由要北上上訪,總之係按真心說話,啱唔啱聽《一言棠》都會講,皆因只為四個字:「我愛香港!」

撰文:歐錦棠
除表演藝術,也酷愛文字、影像及武術,其文章往往一針見血。

足本收睇《亂噏24》x 謝安琪;肥螳螂王晶接力上場!
周一至周五約定你《亂噏24》: http://bit.ly/appletalk24

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載