› 選擇地區
三藩市
紐約
洛杉磯
其他美國地區
香港 台灣 北美
 
2013年11月29日

謝安琪對倪匡有Fantasy

【亂噏24 第21集】被網民推選為女神的謝安琪,同樣得三位前輩黎智英(肥佬黎)、蔡瀾及倪匡的歡心,她亦大談對三人的感覺,坦言對肥佬黎最感興趣,另幻想倪匡像衞斯理有型。《亂噏24》足本版逢周四晚上11時播出,讀者可在 http://bit.ly/appletalk24 重溫。
撰文:馮國康、Sidekick

相關新聞:體質差無緣做女警

有別一般歌手,謝安琪(Kay)一向有獨立觀點,她的歌曲亦不太主流,歌詞圍繞民生為主,用她的歌聲捍衞社會公義。三位主持對Kay的獨特甚感興趣,因此節目甫開始,肥佬黎便要Kay逐一品評對他們的感覺。三人之中,Kay笑言對肥佬黎最感興趣:「你梗有啲諗法先想做傳媒,好似我做歌手都有啲嘢想同大家溝通。所以想知你做傳媒嘅心。」肥佬黎認真地答:「你相信嗰樣嘢就做,譬如我相信自由、民主,咪用呢個信念去做。做傳媒係思想共鳴,我諗唱歌都一樣。」

讚蔡瀾有型

Kay自幼閱讀亦舒小說,因此自覺跟衞斯理有份親切感,但倪匡自嘲:「亦舒小說好睇過我!」Kay常幻想倪匡像衞斯理一樣,又有型、又有才、又多靚女。蔡瀾糾正:「佢冇乜靚女,一個咋嘛!」肥佬黎問倪匡筆下的衞斯理明明有條件花心,為何從一而終?倪匡笑說:「個老婆夠惡,又比佢叻!」肥佬黎忍不住笑倪匡:「最理想係咁啦,將自己唔好嘅嘢剔除晒佢!」倪匡大呼冤枉,他稱用第一人稱寫作是為了營造古怪氣氛,才令人產生誤會:「估唔到𠵱家仲有啲儍佬以為係真!」Kay又聽別人說,倪匡有一部電話可以跟外星人溝通,令倪匡笑到面紅。至於蔡瀾,Kay跟他見面比較多,又是他的微博粉絲,看他怎樣瀟灑地回應人家的問題:「你都係一、兩個字搞掂佢哋,好有型!」
Kay05年參加學校歌唱比賽,認識了現在的監製周博賢,發現大家音樂理念相近,便合作起來,由最初成立獨立公司做音樂,到現在簽唱片公司,更憑一首唱到街知巷聞的《囍帖街》成為樂壇天后。回想這一切,Kay自覺幸運,因當年與她一同入行的歌手,大部份都消失得無影無蹤,只因香港樂壇開始沒落。她說:「香港樂壇有過好輝煌嘅時期,但去到我哋呢一代,呢個光環冇咗,𠵱家唔止要同內地睇齊,係成個亞洲要睇齊。我哋喺製作上同其他地域有距離,製作費已經爭好遠,現階段係我哋要諗辦法。」Kay認為首先要提高歌手的水準,第二是唱片業面對新興的網絡媒體,要找尋新的方向。

肥佬黎似乎對音樂市場頗有研究,他說:「以前有一兩首好歌,其他六、七首豬頭骨都擠埋落去,但為咗嗰兩首歌都會買(唱片)。𠵱家一首首歌去競爭,所以競爭大好多,真係要打真軍。」Kay深表認同,現在做一張概念唱片已非常艱難:「我哋派台都好心罨,一張唱片明明做咗十首作品,但每首歌派台時間可能得四個禮拜,藝術生命好短!」肥佬黎繼續以生意人角度分析:「我唔識歌,我亂噏,我覺得首歌會紅,第一要配合歌手性格去唱。如果佢嗰陣失戀,歌曲就感動到人。第二,要配合當時一般人嘅情緒,大眾會有種mood,如果首歌hit中嗰種mood就掂。」
音樂跟寫作一樣,都需要創作靈感,倘若遇到好的作曲家及填詞人,作品一定如虎添翼。Kay說:「其實音樂用心做同唔用心做係好易聽得出。」倪匡記得張學友說過:「沒有林振強就沒有他」,說明了填詞人的重要性。只可惜Kay出道得遲,沒有緣份跟才華橫溢的林振強合作。提到林振強,倪匡覺得他幫《忽然1周》起名好到不得了,原來這名字是肥佬黎和林振強的共同創作,肥佬黎說:「佢初初想到《忽然1橙》,『周』字係我擠落去。」兩人是凹凸拍檔,多年來合作無間,他憶起故友:「你同一個咁樣嘅創作人一齊,你會好開心,你唔需要無無謂謂拗餐死。老實講,佢真係天才。」

曾四度爆肺

Kay是虔誠基督徒,也許上帝要給她試煉,要她爆四次肺來考驗她的歌唱生涯。原來她未足月出生,肺部未完全長成,她入行前已爆了三次肺,08年事業高峯時又爆一次,她苦笑說:「做歌手爆肺呢件事都係重點嚟,人生有呢個安排都幾特別吖!」肥佬黎認為唱歌是一條漫長的路,要唱到身體都有記憶,便真正懂得唱歌。Kay如遇知音:「咦,你真係學過唱歌喎!」
除了音樂,Kay最近參演新片《末日派對》,電影探討不同的社會問題,其中涉及劏房情節。蔡瀾認為他們年輕時也沒有房子,只能靠拚命工作去賺錢買樓,肥佬黎十分認同:「我哋嗰時邊有諗買樓㗎!最多諗吓買架車媾女咋嘛!」不過當年的樓價跟今天有如天壤之別,70年代還是二百多元一呎。肥佬黎不禁呻笨:「有條友帶我去美孚新邨,嗰陣時一房一廳兩萬蚊,佢買咗十幾個單位。佢叫我買啲、買啲,但嗰時你唔會信樓市㗎嘛,梗係投資啲錢去做生意啦!如果嗰陣時買樓,都真係發咗都唔定!」

說到劏房,倪匡不明白為何會形成社會問題:「我覺得𠵱家劏房居住環境好過以前!」肥佬黎即時和應,回想當年居住的間隔房,沒窗沒冷氣,慘況不足為外人道:「嗰時住花園街,40蚊(一個月)頭房,嘩發達啦!我住第一晚,梗要開窗啦,冇冷氣通風吖嘛。一開咗窗,啲老鼠喺度過!嗰條必經之路嚟,唔怪得冇人住。你一閂窗又熱到你死,啲老鼠仲要轟轟轟轟撞你啲窗。大佬,嗰啲先至叫劏房嘛!」Kay覺得劏房的衞生問題還是其次,最傷是經營者牟取暴利。

高登女神現真身 品評老男人
http://bit.ly/talk242101

美女偏愛壞男人 識搞笑最冧
http://bit.ly/talk242102

老公o氹女人好心傷 安琪難逃七年之癢
http://bit.ly/talk242103

唱極唔紅有原因 皆因啲碟無張得
http://bit.ly/talk242104

連繼爆肺有真相 挑戰難度越唱越強
http://bit.ly/talk242105

中國人消滅中國人 邊本書睇得咁過癮
http://bit.ly/talk242106

人工漲千倍 難敵天價樓
http://bit.ly/talk242107

劏房搵窮人笨 政府管唔掂至真
http://bit.ly/talk242108


愛藝術定愛黃金 倪匡︰話自己藝術都係呃人
http://bit.ly/talk242109

捐款唔知去邊 係宣傳定係慈善?
http://bit.ly/talk242110

足本收睇《亂噏24》x 謝安琪;肥螳螂王晶接力上場!
周一至周五約定你《亂噏24》: http://bit.ly/appletalk24

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載