蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年12月05日

亞視癡漢陳啟泰:
沒有死心只有痛心

302,608

【電視風雲之心仍未冷】現年49歲的「亞視癡漢」陳啟泰(Ken)9月離巢,回復自由身的他正好迎上新電視時代,曾主持《百萬富翁》節目為亞視創高峯,可惜人走茶涼,亞視網頁馬上將他除名,以為陳啟泰對亞視死心了,他卻依然說未死心,仍視亞視為娘家,並自我解嘲說:「唔會死心,張相唔係好靚。」對亞視這個被港人唾棄的電視台,經歷過高低起跌的Ken黯然說:「幾痛心!」

電視圈風雲變色,王維基攞唔到免費電視牌照、無綫仍一台獨大、亞視積弱苟延殘喘,陳啟泰雖有心留低,惟傾約時亞視不確定會否製作新節目,Ken順勢變為自由身,他前日接受本報專訪時說:「5、6年前已想自由身做,但時機唔成熟,我係保守嘅人,每月要見到出糧有錢至開心,所以要等23年後至夠膽做呢樣嘢。」
在Ken踏出第一步的個多月前,政府宣佈增發兩個免費電視牌,更是他一大喜訊,是否等自由身等了很多年?Ken笑言:「等咗49年啦!香港係奇怪社會,台灣有幾十至一百個台,香港只得兩個免費台、兩個收費電視。」但他認同政府經過佳藝電視慘劇應審慎發牌:「我唔係唔支持王維基劇,但計全面性,有線超過20年經驗,有廠房有新聞部資訊旅遊,now雖然唔夠10年,但李生實力雄厚。」

跳槽有線鮑姐喊

在亞視11年,陳啟泰做過無人不識的《百萬富翁》,拍過《我和殭屍有個約會》系列劇集,後來亞視近乎零製作,是否很難受?Ken說:「話亞視收視低,邊個最唔開心?係鮑起靜最唔開心,跟住係陳啟泰,因為呢啲人做得最耐,老細只喺亞視3、4年,佢未去過廣播道總台。好記得鮑姐攞金像獎女主角,喺後台一推門入嚟話:『亞視嘅crew喺邊?』你點可以搵到咁忠心嘅老臣子,呢樣對我哋做得耐嘅人係幾痛心,亞視成績唔好,第一矛頭唔係指向幕後、老細,係指住鮑姐、陳啟泰,但我深信亞視可以做好啲嘅嘢,始終亞視係我娘家。」是否因為換老細次數太多?Ken哈哈笑:「係未換啱啫!都曾經有小陽春,《百萬富翁》時係封小平,唔係話王征唔勁,《感動香港》係佢諗出嚟,但另一啲可能唔係咁啱香港人。」

09年亞視破天荒將Ken借到有線做節目,至今仍令他耿耿於懷,Ken坦言:「嗰時台灣老闆縮減製作,首當其衝係我、朱慧珊呢啲最貴藝員,鮑姐聽到我話過有線,佢就喊住話:『點解會咁?』服裝阿姐大眼紅住眼話:『呢個櫃留番畀你第時返嚟。』好多亞視人有情有義,開多兩個免費台對亞視好,觀眾唔鍾意睇有多兩個選擇,畀亞視無形壓力。」

指收到風轉老細

Ken約滿不久,亞視網頁很快將他除名,可對亞視死心?Ken笑言:「唔會,張相唔係好靚。」對亞視常被當笑話,Ken自然笑不出:「我笑唔出亦唔會笑,有次百萬行起步,亞視隊伍行出嚟,有啲阿叔講粗口,我哋控制唔到轉老細,但可參與節目創作,只要配合到香港人就得。」不少人望亞視執笠,Ken直言:「直接畀壓力亞視係好,等佢發憤續到牌,之前傳換老細,我都聽到啲風,應有好消息。

Ken也曾做過無綫,對於無綫製作,他批評說:「中台日韓都用單機實景拍攝,就算王維基都係,無綫依然三機係對觀眾唔公平,但我唔怪佢,因為有人睇嘛!我冇怪過啲劇同以前一樣,唔係,應該仲差過,記得之前嘅《神鎗狙擊》,有周海媚、張兆輝,都係我年代嘅,回帶去20年前又係呢啲做主角喎,又係呢啲橋,唔同係穿崩多咗,電視機清咗,佢兩個老咗少少,不過我哋幕後睇就唔舒服,冇進步。」
採訪:羅美倫

全民起義,網民話事!
立即登入萬千星虧頒獎禮投票網,投下心目中最虧之選。
http://campaign.appledaily.com/tvawards2013

娛聞樂陪你走遍全球追星,即Like「娛果」FB 專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載