蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年12月31日

印度演員控訴 簽TVB臨記不如

曾參演無綫劇集及電影的印度演員Singh Hartihan(Bitto),約六年前由特約演員身份被無綫邀請簽約,豈料往後的待遇比特約演員還差,數月前要求終止合約被拒,令Bitto感無助。

Bitto昨日在九龍城接受訪問時說:「拍完港台《有房出租》經朋友介紹入無綫做特約,有日藝員部叫入房傾約話有多啲機會,但簽咗至知拍三日計一個騷,銀碼冇四位數,仲慘過做臨時演員。」他透露若跟白人臨時演員拍同一集戲,白人臨記的收入比已簽約的他多一倍。

相關新聞:人物誌:杜琪峯御用印人

要求解約被拒

要求加人工的Bitto,只獲加了50元一個騷,騷價仍未達四位數,數月前要求再加時被拒:「佢話如再加就要加埋畀其他人,我要養家、仔細老婆嫩呀。」Bitto發覺簽約做自己人反而多勞少得,遂向無綫要求終止合約,回復自由身便可接其他電視台工作,但只是一廂情願。
Bitto說:「無綫話想取消好難,只會抽起份約,抽起即係唔會再有無綫人搵我做嘢,遲啲有線、港視,now開台,我做咗無綫就可以秋後算賬,我只係想白紙黑字清楚我唔係無綫人,但無綫都唔肯,總之唔想出信話取消合約大家冇關係。」

嘆無還擊之力

Bitto承認當日草率簽約,未看清中文合約條文及沒訂明年期,他說:「嗰時佢話畀機會,我又覺無綫一台獨大冇勁敵,係自己蠢咗,之前港視有搵過,但因未恢復自由身冇傾成。」Bitto也作最壞打算,若無綫堅持不終止合約,惟有只拍電影及兼職籃球教練:「無綫同其他大公司一樣有權力就控制一切,我哋升斗市民可以做啲乜!」
記者昨致電黃國桐律師了解,他表示所有合約都應該有訂明年期,假若真的沒訂明,即表示Bitto可隨時離開,但他也懷疑Bitto有可能簽署一些附件,建議他弄清多一次合約內容,才嘗試解約。
採訪:朱小寶
攝影:陳順禎

戲裡戲外,話題最強,立即收睇《動戲場》:
http://hk.movies.nextmedia.com/extra/list/

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載