蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年01月02日
馬上成為壹會員

甘比七連霸 陪大劉迎新年

【灣仔君悅酒店】大劉劉鑾雄前晚如往年到灣仔君悅酒店出席除夕倒數派對,甘比再度冧莊以女主人姿態陪伴,繼續得寵。大劉同長女劉秀融、甘比拖實囡囡秀樺同車而嚟,甘比着白色皮草外套、戴后冠裝飾,悉心打扮,盡顯「劉后」地位。其實自07年除夕開始,甘比已經係大劉倒數鐵腳,僅前年呂麗君同甘比分上、下半場現身,不過倒數時刻都係甘比留低。
而李嘉欣再度同舊愛大劉同場碰面,不過嘉欣選擇同老公許晉亨喺秘道步入君悅ballroom,之後先喺微博貼佢同亨亨面貼面嘅相。
賭王四房梁安琪帶埋四個子女,以及長房超英齊齊迎新年。四太梁安琪同次子猷亨接受訪問時話:「13年尾跟住14年年頭,由年尾好到年頭,年頭好到年尾。」

四太趕咀賭王

四太喺倒數前離開,問佢係咪趕住會賭王睇煙花,佢幽默咁話:「返去,佢啱啱瞓醒,返去咀得唔得,一定要睇煙花咩?」再問會唔會為賭王煮大餐,梁安琪笑住話:「冇,清清哋,先可以1314(一生一世)。」
四房長女超盈着性感低胸開衩裙嚟,由於步伐太大不慎露底,差不多倒數前,佢同胞妹超欣、王愛倫個仔林建億喺大堂有講有笑咬耳仔,佢細佬猷君就拖實西班牙籍女友Francesca倒數。猷君同猷亨倒數後,就同朋友到中環夜蒲,直掃安慶台Play及蘭桂坊Volar,見到被追訪,兩個人都大方祝新年快樂。
採訪:林嘉慈、藍文浩
攝影:陳俊強、朱志聰


逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://add.appledaily.com 睇番足本網上版,除咗有專訪外,仲有好多時裝靚嘢睇!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載