蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年01月08日

與邵逸夫相隔五分鐘離世
何偉龍病逝

在無綫處境劇《城市故事》飾演無良地產公司老闆蘇忠的何偉龍, 昨日在舊老闆六叔邵逸夫離世後的5分鐘,也因病逝世,終年58歲,何偉龍生前創辦的團劇團,於早上10時在官方facebook網頁內公佈何偉龍於早上7時離世。

天經腦海空白

何偉龍一生致力發展和演出舞台劇,最後演出的劇目是上月舉行的《長髮幽靈》,有份演出的邵音音昨日接到何偉龍和邵逸夫的死訊後,即哀傷發微博,之後再悼念何偉龍說:「永別了,巨龍,一路走好。」記者昨午致電邵音音,她說:「我冇心情講,今朝7點收工接到消息,一直喊到𠵱家。」
楊天經也有份演出《長》劇,昨日在電話中說:「我今朝知道呢件事,好突然、接受唔到腦海一片空白,何生嘅學生同演員收到消息之後,即刻趕去醫院見佢最後一面。聽講何生個樣都安詳,我同佢啲屋企人唔係好熟,希望可以藉住呢度問候佢一聲,我都有同啲演員講,有需要可以幫手。」

跟何偉龍相處過,天經讚不絕口說:「做舞台劇嗰陣,佢試過喺屋企跌親,整到塊面瘀咗,不過入咗醫院照完X光,即刻趕出嚟做騷,喺觀眾同演員面前,會撐到底,唔想我哋睇到佢唔舒服一面。何生係一個好有責任心、又好盡責,乜都攬晒上身嘅人。」

歐錦棠讚魄力

歐錦棠昨日在電話中說:「何Sir對話劇界好有貢獻,佢人緣好好,桃李滿門,培育咗好多人才,我知佢近十年身體好大變化,但佢都排到戲,大家就好安心,冇諗到突然走咗,真係好愕然,好傷心。我敢講冇人夠何Sir喺舞台咁有魄力,佢好值得人學習,香港人性格就係咁。」
詹瑞文是何偉龍的學生,他說:「都係朋友通知我,聽啲朋友話係病,真係好可惜,雖然我哋好少交流,但佢係一個好熱情嘅人。」蔡瀚億(BabyJohn)在電話中說:「我好鍾意睇佢演舞台劇,我知佢有重病,身邊朋友都勸佢要休息,但佢仍堅持要繼續演出,冇因為病影響表現,呢份執着好值得我學習。」此外,在《城市故事》合作過的梁思浩,透過WhatsApp哀悼何偉龍願一路好走!
採訪:何慧斯、比華利

話你話:藝術貢獻備受肯定

因為蘇忠一角而為人熟識的何偉龍,本身是舞台劇愛好者,導演作品超過150部,演出劇目多不勝數,他於87年創辦灣仔劇團,2008年易名為團劇團。在94年,何偉龍獲香港戲劇協會頒發「十年傑出成就獎」、01年獲協會頒發最佳導演獎、09年奪最佳男主角獎、06年獲特區政府頒授「民政事務局局長嘉許獎」,表揚他在業界的貢獻,09年香港藝術發展局更頒發「年度最佳藝術家獎」給他 。
但近年何偉龍的身體狀況令人擔心,他因糖尿病引致腎衰竭,長期服類固醇令身體水腫,走起路來一拐一拐需要用枴杖。雙眼因白內障動過八次手術,右眼受細菌感染,淚水會不自覺地流出來,不過他仍未有放棄創作,最後演出作品是《長髮幽靈》。

戲裡戲外,話題最強,立即收睇《動戲場》:
http://hk.movies.nextmedia.com/extra/list/

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載