蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年01月24日

馮仁昭四圍超:
邵音音讚鄭艷麗 清寒不求人 - 馮仁昭

曾拍過三級片嘅鄭艷麗淡出娛樂圈多年,最近被周刊拍到佢喺麥當勞打工,時薪32蚊,佢自食其力嘅精神令人敬佩。原來邵音音同佢一直有保持聯絡,音音姐噚日話佢唔求人,靠自己賺錢,好有骨氣。
噚日音音姐喺電話度話:「佢有戲就拍,冇就喺麥當勞做。佢唔識講嘢、又內向,如果內地、台灣有騷或者請佢上電視,佢就去囉,冇就喺麥當勞做。佢10幾歲喺麥當勞做啦,係佢喺香港第一份工。」

靠雙手搵食

問鄭艷麗生活開唔開心?音音姐話:「OK,佢好簡單。」佢生活環境惡唔惡劣?音音姐話:「唔會,佢清清寒寒過日。冇工作就做part time,你以為個個掛咗明星(個名)後啲錢喺天跌落嚟?冇戲拍嘅藝員咁容易搵份固定工咩?佢唔會求人同借錢,用兩隻手搵錢。」
音音姐唔肯多講點解同鄭艷麗咁熟,但佢講到鄭艷麗細個嘅嘢同佢媽咪嘅事,就知佢哋交情匪淺。
問邵音音覺唔覺鄭艷麗好有骨氣?佢話:「唔係骨唔骨氣,要生活嘛,買個飯盒25蚊都要做一個鐘。我有鼓勵佢揸的士,自己能力去到邊度咪打乜嘢工囉。」
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載