› 選擇地區
三藩市
紐約
洛杉磯
其他美國地區
香港 台灣 北美
 
2014年01月26日

電戲道:吳君如吹雞起義

也許,香港人真的累透了,要倚賴《金雞》幫我們揼骨驅走疲勞。03年沙士襲港,全城愁雲慘霧,吳君如飾演的阿金為港人撥開陰霾;十年後的今日,特區政府劣績斑斑,官商勾結、中港矛盾日漸嚴重,民怨沸騰到極點,於是阿金重返銀幕,在《金雞sss》中碌盡人情卡邀得舊愛杜德偉飾演鴨王。君如謙稱並非要拯救香港,只寄望觀眾能感受到暖流,嘗試苦中作樂。
撰文:張俊銘

上映日期:1月30日

過往《金雞》系列,以反映社會民生問題為主題,吳君如飾演阿金的一生,更象徵着香港精神。今次她拍攝賀歲片《金雞sss》,坦言既非有神聖使命,亦非說教,她日前接受本報專訪時謙虛地說:「我只係一個娛樂家,娛樂大眾,希望觀眾感受到開心。𠵱家香港處於迷茫,我冇能力救香港,但本住真心希望觀眾感受到暖流。」
開拍前,男友陳可辛不停向君如潑冷水,她說:「佢打擊我,叫我小心啲,話蝕死你,個題材去唔到大陸巿場,提醒我好多次,但我個心有團火湧出嚟。」君如隨即找《金雞》拍檔試探反應,他們都表示支持,但陳可辛續說:「你想攞幾錢出嚟拍?不如我畀番你攞去炒樓,或者買粒保值嘅鑽石。」受盡男友冷嘲熱諷,反而燒旺君如的鬥志,她說:「曾經同我拍過《金雞》嘅朋友都肯陪我,個個都比十年前升值唔止百倍,我就攞呢個《金雞》品牌四處搵投資者,最終真係搵到。」

相關新聞:王菀之獻濕吻

讚陳可辛大方

《金雞sss》講述媽媽生阿金帶幾隻「小雞」如王菀之(Ivana)、衞詩雅及林宜芝(Monna)等經歷皮肉生涯,藉此反映社會問題。君如認為Ivana極有潛質做喜劇演員:「相信佢之後做唔番歌星!佢平時畀觀眾嘅感覺係知書識禮,今次反差好強烈,出嚟效果亦非常好。我當日搵Ivana傾,我話畀佢知《金雞sss》幾重口味,又要露胸、擘腿,同男明星肉搏。最終Ivana將角色演得淋漓盡致,其中一幕講摷嘢,Ivana擺雙手喺心口自摷。」

至於男演員方面,君如可謂碌盡人情卡,甚至找來前度杜德偉演出鴨王角色,簡直是神來之筆,她說:「臨拍前兩晚,我同導演(鄒凱光)講,我哋搵嘅人唔係我哋所諗嘅,導演話無計可施,要兩日後拍呢場戲。點知我去派對撞到杜德偉,返到屋企陳可辛突然同我講,點解唔搵杜德偉拍,佢話杜德偉好啱做鴨王,我話係喎!我短訊佢,佢話冇問題,隔兩日我就煩,每隔一分鐘就收到佢call,問我有冇劇本?着乜嘢衫?幾點到?咁就造就咗,最後都係陳可辛大方。」

死黨肯捱義氣

君如又找到視帝黃子華飾演十三少,她說:「我諗佢知道我係佢頭號粉絲,佢嘅棟篤笑我係冇甩過一場。」至於近期紅爆的張家輝,基本上未跟君如合作過,但同樣一口應承,甚至用「化骨龍」方式演出,君如說:「我哋交情係朋友開始。我其實冇諗過佢肯做呢部喜劇同呢個角色,我又係好隨意咁問吓佢,點知佢又一口答應,佢好有義氣畀咗好多日任我拍,兼化骨龍上身,對自己髮型好有要求好專業。」

近年與君如合作最多的要數古天樂,君如說:「古仔好有義氣,佢係第一個陪我開工,拍到最後一日收工。古仔喺呢行好難能可貴,對電影好有熱誠,佢同鄭中基都係呢幾年嘅好好朋友,總之我一話乜,佢哋就撐我。」至於陳冠希處男作《愛君如夢》也是與君如合作,君如說:「我哋有出嚟聯誼,互相問候,我冇諗過陳冠希拍唔拍,只不過角色好啱佢,佢唔單止要戴假髮扮醜,佢喺戲中個名叫根本岸久,佢唔怕影響形象,豁出去做。」
化妝:Midco Chu
髮型:Seiko Sin(Hip Hair Culure)、Zing(Hair Culture)
服裝:Escada、I.T Hysan、Blessed Are The Meek(I.T)

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載