› 選擇地區
三藩市
紐約
洛杉磯
其他美國地區
香港 台灣 北美
 
2014年01月27日

馮仁昭四圍超:安仔跪Fiona叫師姐 - 馮仁昭

自稱小小師弟嘅許志安作狀扮跪,嗌薛凱琪做師姐。

由黃柏高(Paco)掌管嘅太陽娛樂文化噚日喺灣仔舉行「烈日宣言年度發佈會2014」,除咗新加盟嘅許志安同鄧麗欣(Stephy)外,仲有旗下藝人薛凱琪(Fiona)、陳奐仁等撐場,着紅色deep V連身褲嘅Stephy性感上陣,大搶Fiona風頭。
Fiona送金音符畀安仔,司儀森美抵死話:「安仔係師弟,Fiona係大師姐。」安仔即作狀扮跪話自己係好多人嘅師弟,又稱Fiona大師姐,搞到Fiona好尷尬。

開騷搵老婆本

自稱係Fiona小小師弟嘅安仔話同Paco唔係講錢,今次係雙贏計劃,嚟緊入紙紅館開騷,新公司有冇要求佢唔結婚,佢話:「冇講呢啲嘢,唔合事宜唔會寫,自己想拍電影,有啱嘅劇本先拍。」Paco就爆安仔過檔酬金夠佢做老婆本。

Stephy過檔令Fiona嘅一姐地位有變,不過Stephy話大家冇分邊個係一姐,又話一姐嘅稱號會拉遠大家嘅距離。太陽娛樂嘅新合作夥伴吳奇隆以神秘嘉賓現身,原來吳奇隆同Paco會開間新唱片公司「太陽動力」,不過吳奇隆話女友劉詩詩嘅唱片約未完,所以未有計劃簽佢,佢仲避忌話自己唔係老闆,只係打工仔一名。
此外,晚上舉行以懷舊為主題嘅晚宴,除陳志雲、楊受成、林小明、盛品儒等出席外,藝人嘉賓就有苗僑偉、吳千語、陳靜、Ana R.等撐場,當中以江若琳一身黑金低胸裙最搶鏡。
撰文:馮仁昭

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載