› 選擇地區
三藩市
紐約
洛杉磯
其他美國地區
香港 台灣 北美
 
2014年02月09日

有話兒:鄭浩南浪子變湊仔公

鄭浩南向來形象花弗,就連他也估不到自己會是個好丈夫、好爸爸。
攝影:仇志德

粗獷型男鄭浩南(Mark)近日再度活躍香港娛樂圈,他昔日與葉蒨文、柏安妮、大島由加利的段段情史叫人津津樂道,形象花弗,原來這個鄭浩南早已轉型,變成真正的住家男人,會停工一年照顧女兒,準時回家吃飯,由粗變幼,就連他也估不到自己做了個好丈夫、好爸爸。
撰文:羅美倫

正在港拍電影的鄭浩南,外形依然粗獷,其實已有一子一女的他,早已由粗變幼細。02年在馬來西亞拍劇,認識比他年輕11年的現任太太鮑愛玲,拍拖兩個月,已決定放棄香港一切到大馬結婚,Mark日前接受專訪時說:「嗰時同佢乜嘢關係都冇發生過,就係好鍾意佢,我屋企人又喺加拿大,香港只得我一個,就決定過去。」

圍埋講湊仔經

到大馬展開新一頁,Mark既拍戲又與太太搞生意,直到04年有了囡囡喜文,Mark更做了百分百住家男人,為了全天候照顧囡囡,停工一年多,Mark說:「我個女出世頭一年完全乜都冇做,連生意都冇,日日陪住佢,生得佢出嚟,要畀佢知個世界係點,自己唔跟嘅話,細路有乜改變,會怪死自己,如跟晒就算有不愉快事件發生,都盡咗做爸爸責任。」原本早就想多生一個的Mark,直至前年才多添囝囝理文,因待女兒上了小學夠成熟、懂事,才放心照顧另一個:「子女將來點係受父母影響,書本教唔到人生哲理,有啲嘢要自己每樣睇貼啲,呢個世界立立亂,無德無道,好多嘢要提點細路。」
Mark直言現在很享受家庭生活,他笑言:「好得意,𠵱家同吳鎮宇、任達華開緊工,以前坐埋係傾邊度食飯、飲嘢,𠵱家只會講你個仔我個女,搵乜學校,去邊度留學好,又會講吓香港撕裂呢類話題,人大咗,話題都唔同。」Mark留港開工,太太也帶子女來探他,有空會一家大細去食飯、去海洋公園,Mark確實是個百分百住家男人,他說:「我喺邊度都唔出去,飲乜鬼嘢,馬來西亞啲朋友三點零、四點就叫去飲酒,我會去,但八點一定返屋企食飯,老婆話要返去食飯,慣咗,幾好吖,咁正常可保持年輕。」是否好老公、好爸爸?Mark笑言:「我都估唔到有兩樣嘢,一係自己會有細路,二係咁盡責。」

現以家庭為重

Mark總給人花弗感覺,但他不認同:「唔算,一個完咗一個,後生仔識女仔好正常,𠵱家有細路家庭老婆,又要打理生意集中精神拍嘢,做乜要自己咁辛苦,𠵱家都唔會心野,返屋企啦,我外父係嗰邊最後一任華人反黑組總警司,去到邊都有人識我,唔使出去蒲啦,哈哈……𠵱家家庭同事業相比,家庭係非常重要。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載