› 選擇地區
三藩市
紐約
洛杉磯
其他美國地區
香港 台灣 北美
 
2014年02月09日

小齊攝太歲
遭善信夾擊

【諴心誠意上香】
小齊(中)屬馬,囝囝屬鼠,兩個都沖太歲,所以小齊前日入鄉隨俗到荃灣圓玄學院攝太歲。

【荃灣】任賢齊(小齊)呢幾年越做越發,由歌手升呢做娛樂公司老闆,但屬馬嘅佢今年犯太歲,為自己好,為公司、家人都好,小齊今年都有入鄉隨俗去攝太歲。前日下晝4點幾,一身黑白造型、戴紅帽嘅小齊同助手現身荃灣圓玄學院,小齊似乎相當熟路,唔使問人就一支射行咗去售賣太歲衣同香燭嘅地方,買完喺外面上香後隨即入去元辰殿拜祭。

「幫個仔拜埋」

出於尊重,小齊入到殿亦「自動波」除低頂帽,先拜斗姥元君,然後再拜今年太歲。但善信眾多,小齊攞住太歲衣喺人群中逼來逼去,有唔少市民認出佢,小齊一邊排隊一邊逐個打招呼,都幾忙吓。幾經艱苦小齊終排到太歲像前,但仍被人前後夾擊,好彩佢生得夠高大,伸長手繞過一眾師奶、伯伯,拎出太歲衣誠心拜祭。再拜埋自己所屬太歲後,小齊就聽從指示喺外面化寶,可謂相當熟手。
之後記者致電問小齊,佢話自己喺台灣已經拜過一次,但𠵱家定居香港,仲係三粒星居民,所以要入鄉隨俗,佢話:「我今年犯太歲,囝囝屬鼠又沖太歲,幫個仔拜埋,自己唔迷信,但都想求個心安。」佢仲話估唔到前日去都咁多人,明白粉絲平時追星同人逼係幾咁辛苦。
採訪、攝影:黃偉雄

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載