› 選擇地區
三藩市
紐約
洛杉磯
其他美國地區
香港 台灣 北美
 
2014年02月20日

【add】名Chat:何志恩愛港之衫

很多人對何志恩(Johanna Ho)的第一印象,是她跟陳奕迅和徐濠縈很老友,似明星玩腳多於設計師,她也笑言自己出現在娛樂版多過在時裝版。畢業於倫敦著名設計學府中央聖馬丁學院,之後在時裝設計行業打拼,十年前為了女兒回流香港,繼續發時裝夢。往日外國搞騷,被亞洲買手逼掛「歐洲設計師」標籤;今日中環開店,又計劃反攻英國開拓國際線,一切只因想外界認認真真,重視香港設計、香港設計師:「告訴大家Johanna Ho是一個品牌!」
撰文:趙潔恆
攝影:郭賢興

相關新聞:【add】時尚營養

訪問在何志恩的新店內進行,位於雲咸街上的專門店清雅簡潔,精緻陳列了她的心血結晶。眼下的香港零售業難做,租金高得嚇人,何志恩毅然在中環黃金地段獨立開店,膽粗粗也是因被逼遷。「一切都係因緣際會;起初搞網店儲咗一班擁躉,發覺客人都希望試着、摸一摸衫嘅質地;之後同阿徐(徐濠縈)、陳冠希,喺尖沙嘴活方商場分別開店,但發展商收返舖位,可以話逼遷吧!恰巧朋友介紹中環有吉舖,就順理成章選址呢度。」

有名氣更要闖世界

要在時裝界吃得開,經營名氣可說是重要一環,何志恩在英國讀書時跟莫文蔚已是好朋友,又曾為王菲、陳奕迅等造型。但是何志恩絕非想當娛樂版常客,滿盤心思只盼將香港設計推回國際:「剛剛去倫敦同巴黎,同一間公關公司簽咗約,係想發展歐洲嘅市場。就好似Kylie Minogue現象,佢離開澳洲,去到英美打入流行榜,成咗名返到澳洲就吃香咗,我嘅心態都一樣,要國際化去睇整件事。加上香港呢間店,其實係想做到一個較國際化嘅定位,直接告訴大家Johanna Ho係一個品牌,而唔係明星,至於內地市場我都希望可以做到,一步一步來吧!」

不做偽歐洲設計師

何志恩盤算國際化,原來也源於一段不愉快的經歷:「我十年前返香港,感受到香港人並唔鍾意香港製造或中國製造嘅設計,非常崇洋。令我最矛盾嘅係,當時我到歐洲做發佈會,有來自亞洲嘅買家,堅持我係歐洲嘅設計師,為何大家同係亞洲人,都要咁樣自己呃自己呢?其實有好多國際品牌嘅產品都喺內地製造,但香港或者中國創作,仍然唔獲得大眾認同。十幾年過去,香港其實仍然崇洋,有部份人嘅心態開始有改變,但重視香港時裝文化方面仍有待發展。」

時尚世界無分年齡

由創作到零售一條龍一腳踢,忙得不可開交,一向樂天嘅何志恩視之為好事。「洗濕咗個頭嘛,當係挑戰吧,純粹喺一個樂觀嘅角度去諗,因為做設計師有半點悲觀就會生存唔到。」她一身以粉紅搭閃電藍的服飾,是她最喜歡的色彩,令人感到歡樂的鮮色調,她續說:「我覺得時裝不應有年齡嘅界限,我最引以為傲嘅係我媽媽都會着我嘅設計,只係佢嫌尺碼太細;好似我身上呢件斗篷,唔同人着自然會有唔同嘅襯法,着出不同嘅風格。」

更多精采時尚內容,盡在 http://add.appledaily.com 。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載