› 選擇地區
三藩市
紐約
洛杉磯
其他美國地區
香港 台灣 北美
 
2014年03月10日

翻拍經典 梁家輝Chilam拱照
張家輝做跛豪

麥當雄與蕭若元於91年炮製的電影《跛豪》,找來呂良偉增肥40磅演跛豪,當年叫好叫座,如今王晶計劃5月底翻拍這部戲,男主角跛豪就換上張家輝飾演,至於梁家輝則接舊版的曾江棒,飾演呂樂探長,而坤哥(肥波)及毒玫瑰分別屬意張智霖及孫儷演出。新版除江湖恩怨情仇外,跛豪與幾位女演員的感情戲也是拍攝重點。

相關新聞:無限致敬:翻拍經典成風

張家輝去年主演的《激戰》及《掃毒》在中港兩地票房都很驕人,連帶片酬作了幾級跳,片酬加至1,200萬,但依舊有很多公司找他合作,最近王晶正大力游說他演出新版《跛豪》。當年呂良偉為演這角色,增肥足足40磅,到底家輝要不要增肥演出呢?王晶昨強調新版《跛》片劇情會有很大改動,舊版主要講述60年代至70年代的大毒梟吳錫豪(跛豪)的生平及事蹟作為人物事件背景題材,當時為增加話題性,還要求主角增肥。但新版就肯定不會要求張家輝變大肥佬,而呂樂則由梁家輝演出,其他演員還有張智霖、孫儷及小宋佳等。

跛豪

跛豪一角,呂良偉當年增肥演出中年跛豪,但張家輝於新片免役。

呂樂

曾江當年演的呂樂備受讚賞,相信影帝級人馬梁家輝會不負眾望。

肥波(坤哥)

鄭則士的肥波一角甚出位,張智霖因身形問題改名為坤哥。

跛豪老婆

葉童當年演繹跛豪老婆性格夠立體,未知做慣甄嬛的孫儷有何突破。

肥波情婦楣楣

葉子楣的波霸身形當年震撼大銀幕,小宋佳接棒未知可夠本事。

毋須增磅演出

張家輝繼《激》後再度挑戰自己,不過今次不是挑戰體能,而是考驗演技,他昨接受電話訪問時說:「王晶搵我演呢個戲時,我覺得幾有挑戰性,好彩佢話唔使增肥,如果又要我肥幾十磅點拍,我就唔敢接,因為上次拍《激戰》又增肥又減肥,對身體好傷,我仲食緊中藥調理身體!𠵱家王晶話新版跛豪會着重內心戲描寫多啲,以另一個角度去拍呢個人物,應該同以前我演過啲角色有唔同,應該會好玩!」
最近還在趕拍卓韻芝新片《失戀急讓》的家輝,今年工作頗忙,找他拍片的公司越來越多,家輝說:「完咗卓韻芝部戲,4月又要開始為我自己導演部鬼片做宣傳,5月底可能要接《跛豪》,之後仲有四部戲選擇中,但我冇可能有時間接得晒,可能都要推戲!」據悉家輝拍完《跛》片,之後會接演林超賢執導的賊王鬥智片,11月有可能會接演一部陳木勝執導、與黃渤合演的動作片,加上樂視與博納公司也有片約找上門,看來家輝想放長假休息都好難!

加重感情戲份

至於王晶表示一直很留意跛豪,他認為新版還可以有很多故事來拍,經過考慮後,他不會要求張家輝增肥:「其實跛豪本身都唔係肥,𠵱家張家輝身形都OK,我覺得唔需要刻意去增肥拍,而且今次係想加強戲劇性,除咗江湖激烈鬥爭外,仲會加重跛豪同幾個女人之間嘅感情戲。因為係合拍片,幾位女角都會搵內地女演員,心目中想搵孫儷做毒玫瑰,又或者會搵小宋佳演其中一角。」
問到為何有意重拍《跛》片?王晶笑說:「其實係因為同張家輝傾合作,佢話好想演梟雄角色,咁我諗諗吓,覺得跛豪呢個人物幾啱佢做,而且我哋今次會多拍人性面,咁佢會有好多演技發揮機會。上次蕭若元拍跛豪搵陳慎芝畀料,我今次一樣係搵番佢畀料,不過新版會減少色情同粗口場面,而人物角色同舊版都會有啲出入,好似舊版鄭則士演嘅肥波,我想傾張智霖做,但佢一啲都唔肥,所以新版佢會改名做坤哥。」
採訪:鍾國仁

【影壇寵兒】張家輝片約排到年底

近年開拍的電影中,多數找張家輝、古天樂、劉青雲及杜汶澤等孭飛,當中家輝今年的檔期更排得勁密。

(拍攝中)
卓韻芝執導愛情喜劇《失戀急讓》
演員:鄭秀文、黃子華及Angelababy。

(8月)
林超賢執導的賊王鬥智電影
演員:原先與梁朝偉合演,但偉仔辭演。

(11月至12月)
陳木勝執導的警匪片
演員:黃渤

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載