蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年04月11日

亂噏24:陳果學蔡瀾 變態突圍

改編自高登小說的同名電影《那夜凌晨,我坐上了旺角開往大埔的紅VAN》昨日上映,導演陳果、Golden Scene老闆曾麗芬(Winnie)日前聯同戲中主角黃又南、徐天佑和文詠珊亮相《亂噏24》。陳果直言為了答謝眾高登巴打,故意剪了IIB版本,希望賺夠票房開拍續集,令故事更圓滿。節目足本版逢周四晚上11時播出,讀者可在 http://bit.ly/appletalk24 重溫。
撰文:馮國康、Sidekick

有理由相信,《那夜凌晨,我坐上了旺角開往大埔的紅VAN》是全球最長中文片名的電影,連標點共18個字元,導演陳果也幾乎讀錯。電影根據網民Mr. Pizza撰寫的同名高登小說改編,陳果分享拍攝這部戲的始末:「有人介紹呢本書畀我睇,其實佢冇叫我做導演,叫我幫手睇睇拍唔拍得過,我睇完之後覺得幾商業喎,又有殺人又有追人。」

拍姦屍引注意

肥佬黎插嘴:「有冇sex先?」陳果笑說:「都有㗎,但係好大鑊㗎,係強姦場面,強姦完仲要姦屍。」肥佬黎聽到愕了然,即取笑陳果是否喜歡拍變態電影,陳果來招順水推舟:「唔係,嗱,呢個喺蔡San(蔡瀾)嗰度學番嚟嘅,就算你唔變態,你都要拍啲嘢嚟令人注意。你諗吓𠵱家冇爭議性嘅電影,係好難令觀眾關注。」
陳果認為自己比較關心社會,便滲入這些元素在電影中。肥佬黎問:「咁等唔等於賣座先?」陳果稱不太擔心曲高和寡,自問是主流電影出身,當年負責監製其電影《大鬧廣昌隆》的蔡瀾十分認同:「佢係紅褲仔中嘅紅褲仔。」
作為舊派導演,陳果會以觀眾角度出發,嘗試為小說出現的光怪陸離事作合理解釋,他笑說:「蔡San你都知啦,我哋覺得拍親科幻電影都死㗎嘛!」因此便出現了惠英紅飾演的神婆角色,用來解釋為何手提電話接收不到外界訊號。蔡瀾對陳果讚不絕口:「佢就係傳統電影工廠教出嚟,𠵱家嘅導演就唔鬼理你,所以拍出嚟嘅戲有時唔知做乜!」

群戲人人主角

除了影后惠英紅,《紅VAN》雲集影帝任達華、林雪等好戲之人,又有年輕後輩如黃又南、徐天佑和文詠珊,要顧及各演員的戲份也相當考功夫。陳果沒有將戲份特別集中某位演員身上,反而以群戲方式演出,他說:「呢部戲大家都係主角,每個人都發揮到。」天佑認為這是個有趣經驗:「群戲有群戲好玩,譬如我拋個波畀華哥,華哥又拋番個波畀林雪,唔會着重自己去solo演出,要draw個鏡頭,反而大家嘅交流好好玩。」
陳淑莊(Tanya)最近看了梅麗史翠普(Meryl Streep)和茱莉亞羅拔絲(Julia Roberts)主演的《一個葬禮四個失禮》(August:Osage County),令她印象深刻,她說:「嗰啲飯枱戲好經典,因為由細到大,睇親都係無綫嗰啲飯枱戲嘛,睇到唔想睇,唔係BBQ就食飯。」
蔡瀾提到當年電影《十二怒漢》(12 Angry Men),那場法庭群戲堪稱經典,陳果說:「我哋都參考過,但覺得個戲種唔同。」陳果讚華哥和惠英紅相當大方,沒有刻意搶過後輩鏡頭,令感覺變得整體。
原裝版《紅VAN》有大量地道粗口及姦屍情節,故被評為三級,陳果會推出IIB版本,主要是照顧一班未成年的高登巴打絲打,畢竟電影出自高登討論區。原著中,姦屍的是兩名年僅15歲的MK仔,但陳果作出了適當修改,他說:「要處理呢場戲都幾難,我覺得唔應該畀佢哋15歲,因為我驚道德意識形態唔過(檢),而且唔想放大件事。」

陳果又稱因為這班忠實高登仔,令他重新部署電影的上映安排,他說:「本來我哋諗住部戲7月上,但因為高登關係,同埋條teaser有成80萬人睇過,我哋覺得唔應該拖咁長,所以就安排喺今個月。另外希望啲人睇完我哋可以開拍第二集,費事爛尾。」
肥佬黎問陳果會否在高登「插地盤」,出post引起討論?陳果笑說:「唔使組織啦,高登好勁㗎!」Tanya亦深明高登仔心理:「嗰啲巴打好鍾意自己地盤,既然嗰個係佢自己嘅baby,佢哋一定會繼續做宣傳。」
提到拍攝趣事,陳果認為最難度高是拍攝紅van戲份,因全程要拖着來拍:「林雪又唔識揸車,又要扮司機,你話死唔死!」另一方面,因紅van空間有限,容納17位演員之外,還有一班工作人員收音、打燈,因此相當難拍。
另外,要拍攝香港無車無人都相當考功夫,肥佬黎問:「照計有好多嘢可以用animation做?」蔡瀾認為這樣做會很昂貴,肥佬黎笑說:「唔貴,你畀我做吖嘛!」

有風險先投資

Golden Scene老闆曾麗芬(Winnie)向來眼光獨到,如彭浩翔的《低俗喜劇》和黃修平的《狂舞派》,都是她決意投資,今次為何看中《紅VAN》?她說:「其實係陳輝虹睇到,咁啲高登brothers好想搵又南做,咁我哋又好夾咁,話不如搵阿果導吓。」當年她投資勵志片《狂舞派》也不被看好,結果電影票房口碑俱佳,Winnie居功至偉。她又說:「我好衰嘅,應承咗人我就做。」
陳果坦言這次有一定程度風險,因為很難打入內地市場,他說:「因為入面有好多劇情,佢哋又唔明解,跟住拖吓拖吓盞死,又唔知改到六親不認,不如唔好搞。所以有純拍一部香港片,呢個決心係OK。」
化妝:Katherine Tsang
髮型:Matt Chiu of Xenter
服裝:Sportmax Code

尋歡攞料

有草根導演之稱的陳果,當年以超低成本五十萬拍出得獎作品《香港製造》,蔚為佳話。當然他的「九七三部曲」及「妓女三部曲」(有一部未完成)也為港人熟悉。Tanya說:「一聽陳果個名,我哋會有心理準備咁行入戲院。」
陳果表示回歸前後有很多內地女子來港賣淫,觸發他拍攝這類題材。蔡瀾問陳果:「你有冇經驗?」陳果不諱言:「梗係有啦!阿蔡San,要經歷所有research、要做嘅我都做晒,嗰啲嘢你唔係親臨其境係做唔到!」

紅VAN駛入電影院 爆紅話題講不完
http://bit.ly/talk243901

香港人消失晒 皆因氣氛有古怪?
http://bit.ly/talk243902

高登巴打太出力 紅Van都要早啲上映
http://bit.ly/talk243903

香港輸晒畀東南亞 市場萎縮導演怕怕
http://bit.ly/talk243904

紅Van困獸鬥 集體演出冇人搶風頭
http://bit.ly/talk243905

攝影數碼化 車內打燈唔太難
http://bit.ly/talk243906

高登巴打愛又南 陳果為紅Van獻片酬
http://bit.ly/talk243907

無大陸市場好危險 群星減價拍港產片
http://bit.ly/talk243908

攞政府錢鬧返政府 呢架紅VAN惡過老虎
http://bit.ly/talk243909

橫死掂死唔做處男 意識大膽要剪好難
http://bit.ly/talk243910

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載