› 選擇地區
三藩市
紐約
洛杉磯
其他美國地區
香港 台灣 北美
 
2014年04月26日

Baby施冧功 婆媳冇拗撬

【上海直擊】劉嘉玲、Angelababy(楊穎)、林志玲、趙薇及桂錀鎂等中港台三地靚人,前晚齊齊現身上海,出席英倫時裝品牌Burberry舉行的旗艦店活動,同場還有新「姬魔」Cara Delevingne行騷。眾女星齊齊鬥性感,當中Baby最為搶鏡,身穿紫色蕾絲上衣,襯寶石紗裙,透視一雙美腿,搶鏡程度力壓台灣第一女神林志玲的deep v谷胸晚裝裙,而嘉玲與趙薇則以品牌簽名式的風褸示人。
Baby近日時間大多與男友黃曉明糖黐豆去旅行,早前更與他父母一齊去南韓,為曉明母親慶祝生日,她表示:「係一齊去慶祝,有十幾個人,同埋佢爹哋媽咪,佢好錫屋企人,希望帶佢哋環遊世界,佢屋企人好人同好好玩。」

嘉玲心痛偉仔

Baby透露與曉明送了手錶給未來奶奶:「係心意,佢好鍾意,唔係貴,心意緊要啲。」記者笑言曉明媽生日願望會否想二人結婚,她表示:「冇,佢哋好開通,所以同佢哋相處冇壓力。」提到有指蔡少芬爆響口指她們想快結婚生B,Baby笑言:「冇,係傳聞,只係講過自己鍾意小朋友,唔知點解傳成咁,下次唔會多講啲乜嘢。」

此外,嘉玲透露近日忙為與梁家輝、謝君豪合作的舞台劇籌備:「2000年同家輝合作過,嗰時唔識舞台劇,𠵱家認識咗,知乜嘢係享受。」提到梁朝偉失落香港金像獎影帝,有否安慰對方?嘉玲表示:「唔會,不過自己有少少唔舒服,作為一個獎項佢輸得起,一代宗師係梁朝偉,套戲攞到咁多獎,點解佢冇攞獎。」
採訪、攝影:曾小嘉

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載